Sall-ortalyǵyna 1403 nómiri boıynsha habarlasýǵa bolady.
Qysta «Qazaqavtojol» jaýapkershiligi shekteýli seriktestiginiń jol qyzmetteri respýblıkalyq trassalardy táýlik boıy tazalaý jáne qolaısyz aýa raıynda avtokólikterdi súıemeldeý jumystaryn júrgizdi, dep habarlaıdy Almaty-akshamy.kz QR Indýstrıa jáne ınfraqurylymdyq damý mınıstrliginiń baspasóz qyzmetine silteme jasap.
Qolaısyz meteorologıalyq jaǵdaılarda alys saparǵa shyqpaý týraly arnaıy qyzmetterdiń eskertýlerine qaramastan, keıbir jolaýshylar turǵylyqty mekenjaılarynan tys jerlerge shyǵyp, tótenshe jaǵdaılarǵa tap bolyp jatty.
Máselen, ótken qysta jol qyzmetkerleriniń kúshimen qar qursaýynan 720 kólik quraly shyǵaryldy. Olardyń 391-i jyly bokstarǵa ornalastyrylsa, jolda qalǵan 2 myńnan astam adam «Qazaqavtojol» jylytý pýnktterine jaıǵastyryldy. Jalpy, elimiz boıynsha barlyq qajetti jabdyqpen qamtamasyz etilgen 133 jylytý pýnkti jumys isteıdi.
Esterińizge sala keteıik, jolda kútpegen jaǵdaılar týyndaǵan kezde, táýlik boıyna Biryńǵaı sall-ortalyǵyna 1403 nómiri boıynsha habarlasýǵa bolady.