Eldegi bar astyq pen unnyń kólemi ishki qajettilikti óteýge jetedi.
15 sáýirden bastap Qazaqstan astyq pen unnyń eksportyna shekteý qoıady, dep habarlaıdy Almaty-akshamy.kz
Aýyl sharýashylyǵy birinshi vıse-mınıstri Aıdarbek Saparovtyń aıtýynsha, eldegi bar astyq pen unnyń kólemi ishki qajettilikti óteýge jetedi.
Saparov ishki naryqtaǵy tapshylyqty joıý jáne un tartatyn kásiporyndardy júkteý úshin shekteý sharalary qajet ekenin aıtty.
«2022 jylǵy 1 sáýirde Syrtqy saýda saıasaty jáne halyqaralyq ekonomıkalyq uıymdarǵa qatysý jónindegi vedomstvoaralyq komısıa 15 sáýir men 15 maýsym aralyǵynda bıdaı men un eksportyna kvotalardy engizý týraly sheshim qabyldady. Bıdaıǵa arnalǵan kvotanyń kólemi 1 mıllıon, unǵa 300 myń tonna», - dedi Saparov Ortalyq komýnıkasıalar qyzmetinde ótken onlaın brıfıńte.
Birinshi vıse-mınıstr ishki naryqtaǵy naqty jaǵdaıdy baǵalaý úshin mınıstrlik Ulttyq statısıka búrosymen jáne jergilikti atqarýshy organdarmen birlesip, óńirlerdegi bıdaı qoryn túgendeý jumystaryn júrgizip jatqanyn aıtty.
«7 sáýirdegi jaǵdaı boıynsha, qorlar 118 myń tonna undy quraıdy, onyń ishinde turaqtandyrý qorlarynda 10 myń tonna, «aınalym sqemasy» sheńberinde 22 myń tonna, óndirýshilerde 48 myń tonna, qoımalarda shamamen 20 myń tonna jáne saýda obektilerinde 18 myń tonna bar. Kórsetilgen kólem ishki qajettilikti qamtamasyz etý úshin jetkilikti. Sonymen qatar, «Azyq-túlik korporasıasynyń» resýrstarynda 800 myń tonnadan astam astyq bar, olar qajet bolǵan jaǵdaıda jaǵdaıdy turaqtandyrý úshin ishki naryqqa jiberiletin bolady», - dep tolyqtyrdy Aıdarbek Saparov.