IT salasy jandanýda
«Astana Hub» 500 mln dollarlyq IT-qyzmetterdi eksporttamaq, dep habarlaıdy Almaty-akshamy.kz Qazaqtv.com saıtyna silteme jasap.
Intellektýaldy navıgasıalyq júıe, bilim berý platformalary, zamanaýı qala kósheleriniń beınetaldaýy jáne taǵy da basqa qyzmetter.
Budan ózge IT salasynyń kásipqoılary taǵy ne daıyndaýda? «Astana Hub» músheleriniń kúndelikti tyń oılary qazaqstandyqtardyń ómirin áldeqaıda jaıly etetin naqty jobalarǵa aınalýda. Búginde talantty qazaqstandyqtar tutas korporasıalar qurýda. Mundaı bıznes tyń ıdeıadan bastaý alýda.
Bul – Qanat Keldibekovtiń ıdeıasy. Onlaın basqarýǵa bolatyn «aqyldy» qulyp. Ol ózi jyljymaıtyn múliktiń ıesi bola tura, birneshe ret qonystanǵysy keletin azamattarmen durys kezdese almaǵan. Nátıjesinde jańa tehnologıa atalǵan máseleniń sheshimin tabýmen qatar, tabysty bıznes kózine aınalǵan.
«Damı bastadyq, mobıldi qosymsha jasadyq. Qytaıdan jetkizýshi taýyp, alǵashqy partıasyn alyp kelip paıdalandyq. Biz mobıldi qosymsha arqyly páterdi 1 mınýtta jalǵa alýǵa bolatyn ónimdi jasap shyǵardyq. Buryn kepteliste turatyn ýaqyttan bólek jalǵa alý úshin 1-2 saǵat ketetin bolsa, qazir basqasha. Úıge qonystanýǵa kóp ýaqyt ketpeýin qadaǵalaımyz jáne qarajatyńyzdy únemdeımiz», - dedi startaptyń negizin qalaýshy Qanat Keldibekov.