İİM shegýge bolmaıtyn temeki ónimderiniń aınalymy úshin jaýapkershilikti túsindirdi, dep habarlaıdy Almaty-akshamy.kz Polisia.kz-ke silteme jasap.
– Qurmetti azamattar! 2024 jylǵy 20 maýsymnan shegilmeıtin temeki ónimderi, elektrondyq tutyný júıeleri, veıpter jáne olarǵa arnalǵan hosh ıistendirgishter men suıyqtyqtardyń aınalymy úshin qylmystyq jaýapkershilik kózdeledi. “Halyq densaýlyǵy jáne densaýlyq saqtaý júıesi týraly” kodekske sáıkes shegilmeıtin temeki ónimderine quramynda nıkotın bar, temeki japyraǵynan ázirlenetin zattar jáne olardyń sıntetıkalyq analogtary jatady. Olar sorý, shaınaý, ıiskeý úshin daıyndalady. Elektrondyq tutyný júıelerine, veıpterge quramynda nıkotın bar nemese joq suıyqtyqty, basqa da hımıalyq zattardy, hosh ıistendirgishterdi qyzdyratyn qurylǵylar jatady. Ózderińiz biletindeı, buǵan deıin İshki ister mınıstrligi turǵyndarǵa jáne kásipkerlerge qabyldanǵaly jatqan ózgeristerdi túsindirý boıynsha jumystar júrgizdi. Atalǵan zattardy satý jáne taratý faktileri anyqtalǵan jaǵdaıda kináli tulǵaǵa 200 AEK deıingi mólsherde aıyppul salynady nemese sol mólsherde túzeý jumystary, ne bolmasa 200 saǵatqa deıingi merzimge qoǵamdyq jumystarǵa tartý jazasy, ıa bolmasa 50 táýlikke deıingi merzimge qamaýǵa alý jazasy qarastyrylady. Osy zattardy ákelgeni jáne óndirgeni úshin múlki tárkilenip, eki jylǵa deıingi merzimge bas bostandyǵynan aıyrý kózdelgen. Eger aıtylǵan is-áreketter adamdar tobymen, asa iri mólsherde, birneshe ret jasalsa, múlki tárkilenip, bes jylǵa deıin bas bostandyǵynan aıyrý jazasy qarastyrylady. Qurmetti azamattar! Zańnamadaǵy kórsetilgen ózgerister elimizdiń bolashaǵy – balalar men jastardyń densaýlyǵyn qamtamasyz etýge baǵyttalǵan, – dedi QR İİM ákimshilik polısıa komıtetiniń erekshe tapsyrmalar jónindegi aǵa ınspektory Erjan Jaqsylyqov.