Balalar klınıkalyq psıhology Aınur Aldasheva elektron kúndelikke qaraǵanda balalar úshin dástúrli qaǵaz kúndelik áldeqaıda paıdaly ekenin aıtyp, Oqý-aǵartý mınıstrligine úndeý jasady, - dep habarlaıdy Aqshamnews.kz tilshisi.
Onyń pikirinshe, qaǵaz kúndelik balanyń ýaqytty durys túsinýine, josparlaý daǵdylaryn qalyptastyrýǵa jáne oqý motıvasıasyn kúsheıtýge kómektesedi.
Mamannyń aıtýynsha, 6-7 jastaǵy balalardyń mıynyń mańdaı bóligi belsendi damı bastaıdy. Al osy damýdy qoldaıtyn tıimdi quraldyń biri - qaǵaz kúndelik.
"Kúndelik balaǵa ýaqytty túsiný úshin kerek. Qazirgi balalardyń kóbi mezgilderdi, aı attaryn, aptadaǵy kúnderdi bilmeıdi. Jattatý qıyn. Jattap alsa da ýaqytty sezbeıdi. Al endi aýqymdy taqyryp. Kúndelikti kúnde qoldanǵan bala qazir qyrkúıek ekenin, aptanyń qaı kúni ekenin, qaı kúni ne bolatynyn bilip júredi. Qaıta-qaıta kórip, ashyp júrgen soń vızýalno este saqtaıdy", - deıdi psıholog.
Kúndelik - vızýal kúntizbe
Balalardyń 90 paıyzy aqparatty kózben qabyldaıdy. Sabaq kestesiniń, tapsyrmalardyń kóz aldynda bolýy balaǵa jospar qurýdy úıretedi.
"Bala josparlap úırenedi. Mysaly, búgin dúısenbi. Beısenbige jattaý bergenin kórdi. Erteń 1 shýmaǵyn jattaımyn, sosyn 1 shýmaq. Beısenbige deıin kúshimdi, ýaqytymdy utymdy paıdalanamyn dep josparlaýdy úırenedi", - dep túsindirdi Aldasheva.
Elektron kúndelik balanyń derbestigin tejeıdi
Psıhologtyń aıtýynsha, bastaýysh synyp oqýshylary elektron kúndelikti ózderi ashpaıdy, ony kóbine ata-anasy baqylaıdy. Nátıjesinde balada óz betimen tapsyrma oryndaý daǵdysy qalyptaspaıdy.
"6-7 jasar bala elektron kúndelikti óz betinshe ashpaıdy. Ony anasy qaraıdy. Anasy qaramasa, aıtpasa, sabaq ta oryndalmaıdy. Oryndaýǵa balada qalaýy da bolmaıdy. Sosyn balanyń ornyna mamasy sabaq oqyp, sabaq kestesin salyp otyrady. Al balada óz betinshe tapsyrma oryndaý qabileti nól bolady. Kúndelikke baǵa qoıylý kerek. Bala sabaqta baǵasyn birden alý kerek. Keshke, erteń degen, elektron kúndelikti kóre salý degen jaramaıdy. Sebebi balanyń sanasynda sebep-saldarlyq baılanys joq", - deıdi maman.
Motıvasıa men derbestik damytady
Aınur Aldasheva qaǵaz kúndeliktiń balanyń shapshańdyǵyn, ózine qyzmet etý daǵdylaryn, óz betimen áreket etýin qalyptastyratynyn atap ótti.
"Bala kúndelikpen tezirek damıdy. Shapshańdyq, óz-ózine qyzmet kórsetýi, ózi úshin áreket etýi, óz betinshe tapsyrma oryndaýy qalyptasady", - dedi psıholog.
Mamannyń aıtýynsha, mektepterde bastaýysh pen orta býyn oqýshylaryna qaǵaz kúndelik qoldanysyn qaıta engizý - balalardyń oqý motıvasıasyn arttyryp, óz betinshe damý daǵdylaryn nyǵaıtady.
"Naqtyraq baladaǵy uzaq merzimdi durys motıvasıany oıatady. Men 2 "bes" aldym, endi 3 "bes" alamyn dep úıge kelgendegi sezim esterińizde ma? Durys motıvasıa solaı qalyptasady. Bastaýysh pen orta býyn oqýshylarynda kúndelik bolýy kerek. Ásirese, zeıin tapshylyǵy bar balalarda kúndelik mindetti túrde bolýy kerek", - dep qorytyndylady maman.