Qazaqstanda AES salý basqa memleketterge saıası táýeldilikti arttyrmaıdy, kerisinshe, eldiń energetıkalyq táýelsizdigin nyǵaıtýǵa yqpal etedi. Bul strategıalyq mańyzdy joba Qazaqstanǵa óz energetıkalyq resýrstaryn derbes basqarýǵa múmkindik beretin senimdi jáne turaqty energıamen qamtamasyz etýge baǵyttalǵan.
Jobanyń qaýipsizdigin qamtamasyz etý jáne syrtqy táýekelderdi azaıtý maqsatynda senimdi halyqaralyq seriktestermen yntymaqtastyq tetikteri men ozyq tehnologıalardy engizý kózdelip otyr. Qazaqstan AES jobasynyń eń joǵary standarttarǵa saı bolýy jáne el múddesine tolyq sáıkes kelýi úshin qarqyndy jumys atqarýda.
AES – saıası emes, komersıalyq joba. Seriktes retinde tańdalatyn kez kelgen kompanıa AES salýmen aınalysady, biraq onyń jumysyna qatyspaıdy. Qazirgi ýaqytta Qytaı, Koreıa, Reseı jáne Fransıamen kelissózder júrgizilýde. Osy elderdiń arasynan Qazaqstannyń qajettilikterine keshendi túrde jaýap bere alatyn seriktes tańdalady. Sonymen qatar, amerıkalyq (NuScale) jáne amerıkalyq-japondyq (GE-Hitachi) birlesken kompanıalarynyń tómen qýatty perspektıvti reaktorlary zerttelýde.