Tokıo olımpıadasynyń qola júldegeri Eldos Smetov sporttan ketpeıdi. Bul jaqsy jańalyqty dańqty sportshy áleýmettik jelidegi paraqshasynda málimdedi.
«Eger sportty odan ári jalǵastyryp, 2024 jylǵy Parıj olımpıadasyna qatysatyn bolsam, mindetti túrde 66 kelige aýysamyn. Bul týraly elge oralǵan boıda aıtqan edim. Bári de jaraqatyma baılanysty bolyp tur.
Eger densaýlyǵym jarap, jaraqattarym mazalamasa, mindetti túrde kúresemin. Óıtkeni, kúres – meniń ómirim. Men sporttan lázzat alamyn. Elimizdiń Týyn jelbiretý úshin jumys isteımin. Olımpıada aıaqtaldy, jaraqattarymdy emdep bastaımyn. Bári de jaqyn arada belgili bolady», – dep jazdy E.Smetov.
Esterińizde bolsa, Rıo jáne Tokıo olımpıadalaryna Eldos 60 keli salmaq dárejesinde qatysyp, kúmis jáne qola júlde jeńip aldy. Ol dzúdo kúresinen qos olımpıadanyń júldesin jeńip alǵan alǵashqy qazaq sportshysy bolyp otyr. Al 66 keli salmaq dárejesinde bıylǵy olımpıadaǵa Erjan Serikjanov qatysyp, úlken tabysqa jete almady.
Jalpy, Tokıo júldesin jeńip alǵan E.Smetovke ǵana emes, jyl boıǵy jarystarda el namysyn abyroımen qorǵaǵan sportshylardyń bárine Qazaqstan dzúdo federasıasy jaqynda Nur-Sultan jáne Almaty qalalarynda úlken qurmet kórsetti. Qazaqstan dzúdo federasıasynyń prezıdenti Qaırat Qojamjarov sportshylar men jattyqtyrýshylar, ulttyq quramanyń ǵylymı-keshendi top ókilderine aqshalaı syıaqy taǵaıyndady. Olımpıada júldegeri E.Smetov 5 mln. teńgeniń sertıfıkatyna ıe boldy.
«Biz búgin jyldyń eń mańyzdy dodasy sanalǵan olımpıadany qorytyndylap otyrmyz. Tokıo tórinde bizdiń maqtanyshymyz Eldos Smetov óte nátıjeli kúres kórsetip, el qorjynyna qola júlde saldy. Bul biz úshin, Qazaqstan dzúdosy úshin tarıhı júlde bolyp sanalady. Eldos – dzúdodan olımpıadanyń eki dúrkin júldegeri atanǵan tuńǵysh qazaqstandyq sportshy. Jaraqattaryna qaramastan ol óziniń álemdik dárejedegi myqty sportshy ekenin taǵy bir ret dáleldedi», – dedi Q.Qojamjarov.
«Qazaqstan dzúdosy úshin bıylǵy jyldy jaman boldy deýge bolmaıdy. Pandemıaǵa jáne kezdesken qıyndyqtar men shekteýlerge qaramastan ulttyq qurama sportshylary qatysqan mańyzdy jarystardan júldesiz oralǵan joq. Máselen, álem chempıonatynan Ǵusman Qyrǵyzbaevtyń kúmis júldesin, Eldos Jumaqanovtyń Azıa chempıonatyndaǵy qola júldesin aıtýǵa bolady. Qyzdarymyz da bıyl júldeden qalys qalǵan joq. Ábıba Ábýjaqynova áıelder arasynda Azıa chempıonatynyń kúmis júldesin ıelense, Sevara Nyshanbaeva qola medal jeńip alyp, úzdik úshtikke endi», – dedi federasıa prezıdenti.
Almaty qalasynda ótken jıynda osy sportshylardyń barlyǵyna jáne kózge túsken jattyqtyrýshylarǵa aqshalaı syıaqy tabys etildi.