Ekinshi orta salmaqtaǵy boksshy Aıdos Erbosynulynyń (15-0, 10KO) jańa qarsylasy anyqtaldy.
Bıylǵy 17 sáýirde Aıdos IBF nusqasy boıynsha álem chempıony ataǵyna mindetti úmitker ataný úshin reseılik Evgenıı Shvedenkomen (15-0, 6KO) kezdesýge tıis edi. Germanıanyń Karlsrýe qalasynda ótýge tıis jekpe-jekke bir apta qalǵanda Aıdostyń koronavırýs juqtyryp alǵany belgili boldy. Sóıtip, kezdesý múlde ótpeıtini aıtyldy.
Sodan keıin A.Erbosynuly elge kelip emdelip, ábden saqaıdy. Boxingscene.com saıtynyń aqparaty boıynsha, Erbosynuly 12 qyrkúıek kúni gaıanalyq boksshy Allen Lennokspen (22-1-1, 14KO) kezdesedi. Bul jekpe-jekte ekinshi orta salmaq dárejesi boıynsha WBA nusqasyndaǵy álem chempıony ataǵyna mindetti úmitker anyqtalady. Jarystyń ótetin jeri ázirshe belgili emes.
Bul kúnderi Aıdos Máskeý (Reseı) qalasynda oqý-jattyǵý jıynyn ótkizip jatyr. Áleýmettik jelidegi paraqshasyna ol osynda biraz jattyǵatynyn, jaqyn ýaqytta jańalyq aıtatynyn jazdy.
A.Erbosynuly 2020 jyldyń jeltoqsanynan beri sharshy alańǵa shyqqan joq. Sol kezde ol Nur-Sultan qalasynda ganalyq Isa Samırdi esten tandyryp, ekinshi orta salmaqtaǵy WBC Asia, WBA International jáne WBO Global ataqtaryn sátti qorǵaǵan bolatyn.
Al byltyrǵy jeltoqsanda IBO nusqasy boıynsha álem chempıony ataǵyna talasyp, 12 raýndtyq jekpe-jekte jkvadorlyq Karlos Gongoradan nokaýtpen jeńilgen otandasymyz Álı Ahmedov te (16-1, 12KO) jaqynda sharshy alańǵa oralady. BoxRec portalynyń habarlaýynsha, Ahmedov 26 tamyzda Kosta-Mesa qalasynda (Kalıfornıa shtaty, AQSH) meksıkalyq Rıkardo Adrıano Florespen (23-8-1, 15 KO) judyryqtasady. Jekpe-jek 8 raýndqa josparlanyp otyr.
Araǵa 20 kún salyp Á.Ahmedov ortaǵa qaıta shyǵady. 16 sáýirde ol Kalıfornıa shtatyndaǵy Montebello qalasynda perýlik Davıd Segarramen (34-5, 21KO) 10 raýndtyq jekpe-jekte qolǵap túıistiredi. Eki sportshy 1 tamyzda Albýkerke qalasynda (Nú-Mehıko shtaty, AQSH) jolyǵýǵa tıis edi. Alaıda, D. Segarranyń koronavırýsqa tapsyrǵan testi oń nátıje berip, jekpe-jek keıingi ysyryldy.