29 sáýir QR Kólik mınıstrligi men «QazAvtoJol» UK» AQ bastamasymen respýblıkalyq mańyzy bar avtomobıl joldarynyń sapasyn tekserý boıynsha keń aýqymdy «Halyqtyq baqylaý» jobasy iske qosyldy.
Bul joba qoǵamnyń elimizdegi jol nysandarynyń sapasyn arttyrýǵa belsendi qatysýǵa baǵyttalǵan, dep habarlaıdy Almaty-akshamy.kz QR Kólik mınıstrligine silteme jasap.
Jobanyń maqsaty – Qazaqstannyń árbir azamatyn salynyp jatqan respýblıkalyq mańyzy bar avtomobıl joldary boıynsha qoǵamdyq baqylaýǵa shaqyrý. Kólik mınıstrligi óz kezeginde anyqtalǵan kemshilikter men máselelerge den qoıyp, ony qysqa merzimde sheshýdi qamtamasyz etedi. Jobaǵa qatysý úshin 1403 baılanys ortalyǵyna habarlasyp, ótinim qaldyrý kerek.
Tirkeý kezinde aty-jónin, baılanys nómirin, sondaı-aq turatyn eldi meken men oblysty kórsetý qajet. Nysandardy aralaý kestesimen «QazAvtoJol» UK» AQ www.qaj.kz resmı saıtynda tanysýǵa bolady. «Halyqtyq baqylaý» jobasy respýblıkalyq mańyzy bar avtomobıl joldaryn barlyq jol qozǵalysyna qatysýshy úshin qaýipsiz ári sapaly etýge arnalǵan.