Memleket basshysynyń tapsyrmasyn iske asyrý aıasynda elimizdiń 9 óńirinde komýnaldyq menshiktegi gıdrotehnıkalyq qurylysjaılardy paıdalaný jáne basqarý boıynsha mamandandyrylǵan uıymdar quryldy.
Sý resýrstary jáne ırrıgasıa mınıstrliginiń apparat jınalysynda jańadan ashylǵan mekemelerdiń jumysy qarastyryldy, dep habarlaıdy aqshamnews.kz.
Atap aıtqanda, arnaıy mekemeler Aqmola, Aqtóbe, Atyraý, Batys Qazaqstan, Soltústik Qazaqstan, Qostanaı, Qyzylorda, Jetisý jáne Abaı oblystarynda jumysyn bastady. Osylaısha, elimizdegi komýnaldyq menshiktegi gıdrotehnıkalyq qurylysjaılardy paıdalaný jáne basqarý boıynsha mamandandyrylǵan uıymdardyń jalpy sany 15-ke jetti.
Búgingi tańda Sý resýrstary jáne ırrıgasıa mınıstrligi jańadan ashylǵan mamandandyrylǵan uıymdardyń fýnksıalaryn, mindetteri men ókilettikterin retteý úshin normatıvti-quqyqtyq bazany jetildirý jumysyn júrgizýde.
«Ákimdikter jańadan ashylǵan arnaıy mekemelerge bilikti mamandardy tartý máselesin qarastyrýy qajet. Ol úshin mamandardyń eńbekaqysyn kóterý, baspanamen qamtý jáne de taǵy da basqa qoldaý is-sharalaryn engizgen jón. Budan bólek, mekemelerdi arnaıy tehnıka jáne qural-jabdyqmen qamtamasyz etý kerek», - dedi Sý resýrstary jáne ırrıgasıa mınıstri Nurjan Nurjigitov.