Sýret – ártúrli boıaýlarmen: akvarelmen (qaǵazǵa nemese karton), maıly boıaýmen (holstqa, kartonǵa, aǵashqa), pastelmen (erekshe túrli-tústi qaryndashtarmen qaǵazǵa nemese kartonǵa) salynatyn óner túri
Ǵalymdar sýret salýdyń úkimin ekige bólip qarastyrady, dep habarlaıdy aqshamnews.kz nMúftıattyń resmı saıtyna silteme jasap.
- Jansyz zattardyń sýretin salý. Tórt mázhabtyń (hanafı, málıkı, shafıǵı, hanbalı) ǵalymdary jansyz nárselerdiń sýretin salýǵa ruqsat etilgendigine biraýyzdan kelisken. Ibn Abbastan jetken rıýaıatta sýret salýshyǵa: «Budan basqa jumys jasaı almasań, myna aǵashtyń sýretin nemese kez kelgen jansyz zatty beınele» , – degen.
- Tiri jannyń sýretin salý. Bul – ǵulamalardyń arasynda tartysty másele. Jumhýr (hanafı, shafıǵı, hanbalı) ǵalymdary tiri jannyń tolyq beınesin salýǵa tyıym salǵan. Paıǵambarymyz (oǵan Allanyń salaýaty men sálemi bolsyn) «Qıamet kúni qatty azapqa tartylatyndar – sýretshiler», – degen.
Málıkı mázhabynyń jáne zamanymyzdyń kóptegen ǵalymdary kóleńkesi joq jany bar nárselerdiń sýretterin salýǵa ruqsat beredi. Sebebi Paıǵambarymyzdyń (oǵan Allanyń salaýaty men sálemi bolsyn) kezinde kóleńkesi joq sýretterdi qoldanǵany týraly rıýaıattar kelgen. Tek ony keıbir sebepterge baılanysty ǵana quptamaǵan. Al sýret salýǵa tyıym salynǵan hadısterdi kóleńkesi bar sýretterge qatysty kelgen dep túsindiredi.
Dese de ǵalymdar sýret salýǵa tyıym salynǵan hadısterdiń quramyna jany bar nárseniń beınesindegi oıynshyqtardyń kirmeıtinin aıtqan. Sebebi onyń balanyń jaqsy ósip, qalyptasýyna jáne bala tárbıesine paıdasy mol.
Osy rette zamanymyzdyń ǵalymdary oıynshyqqa salystyra otyryp bilim berý maqsatynda jany bar nárseniń sýretin salýǵa ruqsat bergen. Sondaı-aq tárbıelik máni bar, paıdaly, sharıǵattyń qaǵıdattaryna qaıshy kelmeıtin mýltfılmderdi shyǵarýǵa da ruqsat etiledi.
QMDB Ǵulamalar keńesi kelesideı sheshim shyǵarǵan:
- Jansyz zattyń sýretin salýǵa ruqsat etiledi.
- Bilim berýde, ǵylymı maqsatta jany bar nárseniń sýretin salýdyń oqasy joq.
- Tárbıelik máni bar, sharıǵattyń qaǵıdattaryna qaıshy kelmeıtin mýltfılmderdi shyǵarýǵa bolady.
- Paıǵambarlardyń beınesin beıneleý – haram.