Áleýmettik mańyzy bar azyq-túlik baǵasy basty nazarda
Premer-mınıstr Asqar Mamın Úkimettiń Sıfrlyq keńsesinde ortalyq memlekettik organdar basshylarynyń jáne óńirler ákimderiniń qatysýymen áleýmettik mańyzy bar azyq-túlik taýarlarynyń (ÁMAT) jáne janar-jaǵarmaı materıaldarynyń (JJM) baǵalaryn retteý máseleleri jóninde keńes ótkizdi, dep habarlaıdy Almaty-akshamy.kz.
Qazirgi jaǵdaı men atqarylyp jatqan jumystar týraly saýda jáne ıntegrasıa mınıstri Baqyt Sultanov, aýyl sharýashylyǵy mınıstri Erbol Qarashókeev, energetıka mınıstri Maǵzum Myrzaǵalıev, Básekelestikti qorǵaý jáne damytý agenttiginiń tóraǵasy Serik Jumanǵarın, Shyǵys Qazaqstan oblysynyń ákimi Danıal Ahmetov, Jambyl oblysynyń ákimi Berdibek Saparbaev, Aqtóbe oblysynyń ákimi Ońdasyn Orazalın, Pavlodar oblysynyń ákimi Ábilqaıyr Sqaqov jáne t. b. baıandady.
Ótken aptada Qazaqstanda áleýmettik mańyzy bar azyq-túlik taýarlary baǵasynyń jalpy ósý ındeksi 0,0%-dy qurady. Qabyldanǵan sharalar esebinen úshinshi apta qatarynan sábiz (-0,8%), pıaz (-0,7%), makaron ónimi (rojkı), kúrish jáne kartop (-0,2%) baǵasynyń tómendeýi baıqalady. Qalǵan ónimderdiń baǵalary turaqty. Óńirlerde «aınalym sqemasyn» qarjylandyrý 48,9 mlrd teńgege jetti. Nysanaly deńgeı 97,7%-ǵa qamtamasyz etildi. «Aınalym sqemasy» boıynsha tıimdi jumys Nur-Sultan, Almaty jáne Shymkent qalalarynda, Almaty, Shyǵys Qazaqstan, Batys Qazaqstan, Qostanaı, Soltústik Qazaqstan jáne Túrkistan oblystarynda baıqalady.
Júrgizilip jatqan jumystardyń tómen deńgeıi Qyzylorda jáne Mańǵystaý oblystarynda saqtalyp tur. Qabyldanǵan sharalardyń arqasynda JJM naryǵyndaǵy jaǵdaı turaqtandy. Búginde barlyq MÓZ táýlik saıynǵy óndirispen jáne ashyq tústi munaı ónimderin ishki naryqqa jóneltýmen shtattyq rejımde jumys istep jatyr. Bıylǵy 19 qarashadaǵy jaǵdaı boıynsha munaı ónimderiniń jetkilikti jıyntyq qory – 200,6 myń tonna benzın jáne 215,8 myń tonna dızel otyny qalyptastyryldy, bul eldiń 15 táýliktik qajettiligin óteýge jetkilikti.
Ótken aptada Básekelestikti qorǵaý jáne damytý agenttigi monopolıalyq joǵary baǵalardy qoıý belgileri boıynsha Qaraǵandy oblysyndaǵy qus fabrıkasyna qatysty tergeý jumystaryn bastady. Qaraǵandy, Shyǵys Qazaqstan, Mańǵystaý oblystary men Nur-Sultan qalasyndaǵy taýyq jumyrtqasy men qus eti naryǵy sýbektilerine baǵalyq sóz baılasý jáne ústem jaǵdaıdy teris paıdalaný belgileriniń bar ekendigi týraly 7 eskertý jiberildi. Batys Qazaqstan, Qostanaı, Atyraý jáne Jambyl oblystarynda óndirýshilermen, kóterme jetkizýshilermen jáne saýda jelilerimen monopolıaǵa qarsy komplaenstiń 14 aktisi jasaldy.
Jalpy respýblıka boıynsha monopolıaǵa qarsy komplaenstiń 154 aktisi jasaldy. Premer-Mınıstr ortalyq memlekettik jáne jergilikti atqarýshy organdarǵa áleýmettik mańyzy bar azyq-túlik ónimderiniń baǵasyn turaqtandyrý jáne tómendetý, sondaı-aq ınflásıanyń jalpy deńgeıin 8,5% sheginde ustap turý jumysyn jalǵastyrýdy tapsyrdy. Óńirlerdiń ákimdikterine óndiris pen tutyný teńgerimin eskere otyryp, turaqtandyrý qorlarynda jetkilikti qorlardy qamtamasyz etý, «aınalym sqemasy» boıynsha qarjylandyrýdy usynylǵan kólemderge deıin jetkizý, baǵa belgileýdiń barlyq tizbegi boıynsha deldaldyq sqemalardy tekseretin óńirlik komısıalardyń jumysyn jandandyrý tapsyryldy.