QR Tuńǵysh Prezıdenti – Elbasy Nursultan Nazarabev Túrki elderi uıymy samıtiniń negizgi messedjderin atady, dep habarlaıdy almaty-akshamy.kz QazAqparatqa silteme jasap.
«Búginnen bastap bizdiń birlestik Túrki memleketteriniń uıymy dep atalady. Bul qadam elderimiz arasyndaǵy yqpaldastyqty ilgeriletý isin jańa deńgeıge kóterip, uıymnyń mártebeli mısıasyn júzege asyrýǵa tyń serpin beredi dep senemiz. Osylaısha Ystanbulda qabyldanatyn sheshimder baýyrlas memleketterdiń kópqyrly ynqtymaqtastyǵyn jandandyrýǵa eleýli yqpal etýi tıis», - degen Nursultan Nazarbaev bul kezeńdi túrki áleminiń damýyndaǵy jańa kezeń dep atady.
«Qurmetti Memleket jáne Úkimet basshylary! Búgin túrki áleminiń damý tarıhynda jańa dáýir bastalǵaly otyr. Bul rette meniń pikirimshe, osy basqosýdan birneshe messedj joldaýǵa bolady. Birinshisi baýyrlas halyqtarymyzǵa baǵyttalǵan. Biz olardyń nazaryn túrki órkenıetiniń álemdik tarıhta kóp ǵasyrdan soń alǵash ret qaıta jańǵyryp jatqanyna aýdaryp otyrmyz. Túrki elderi birigip, jańa kún tártibi men ıdeologıasyn qalyptastyrýda. Sonymen birge memleketterimizdiń, ata-babalarymyzdyń ortaq tarıhyn, rýhanı murasyn qaıta baıyptaý úderisteri júrip jatyr. Basqasha aıtqanda, HHİ ǵasyrda túrki álemi qaıta jandanyp, keń aýqymdy ári ejelgi túrki shańyraǵyna jatatyn elderdiń ózara belsendi jaqyndasý úrdisi júredi», - dedi Elbasy.