Túrkitildes memleketter yntymaqtastyq keńesiniń VII samıtinde Qazaqstan Prezıdenti Qasym-Jomart Toqaev qazaq halqy úshin asa mańyzdy máselege toqtaldy. Ol qıyn-qystaý zamanda qazaqqa qushaǵyn jaıǵan túrik halqyna alǵys aıtyp, osy eldiń memleket qaıratkeri Adnan Menderestiń rýhyna taǵzym etti, dep habarlaıdy almaty-akshamy.kz QazAqparatqa silteme jasap.
– Men búgin taǵy bir óte mańyzdy tarıhı oqıǵa týraly atap ótkim keledi. Bul ótken ǵasyrdyń ortasynda taǵdyr tálkegimen taý asyp, tas basyp, aryp-ashyp Anadoly jerine kelgen myńdaǵan qazaq otbasyn óz baýyrym dep qushaq jaıyp qarsy alǵan Adnan Menderes jóninde bolyp otyr. Ol ótken ǵasyrdyń elýinshi-alpysynshy jyldary, on jyl boıy Túrkıa Respýblıkasynyń Premer-mınıstri bolǵan kórnekti memleket jáne qoǵam qaıratkeri. Qazaqtardyń osynda ornyǵýyna, kásip istep, tamyr jaıýyna kóp jaǵdaı jasaǵan birden-bir tulǵa bolǵany aqıqat. Osy mańyzdy jıyn ótip jatqan Demokratıa jáne bostandyq aralynyń da Adnan Menderestiń taǵdyryna tikeleı qatysy bar. Men Qazaqstan Respýblıkasynyń Prezıdenti retinde qazaq halqynyń atynan Adnan Menderestiń rýhyna taǵzym etip, qushaǵy keń barsha túrik halqyna shynaıy alǵysymdy aıtamyn, – dedi jıynda Qazaqstan Prezıdenti.