Qazaqstandyqtar eGov mobile mobıldik qosymshasynda jáne eGov.kz portalynda nesıe alýdan erikti túrde bas tartatyndyǵy jóninde ótinish qaldyra alady.
Bul týraly Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın málim etti, dep habarlaıdy Almaty-akshamy.kz QazAqparatqa silteme jasap.
«Endi eGov mobile mobıldik qosymshasynda jáne eGov.kz portalynda nesıe alýdan erikti túrde bas tartý jóninde ótinish bere alasyzdar. Iaǵnı, búginnen bastap árbir qazaqstandyq óz erkimen nesıe men mıkroqaryz rásimdeýge tyıym sala alady. Qyzmetke azamattyń tek óziniń ótinish berýge múmkindigi bar. Nesıe men mıkroqaryzdy rásimdeýge tyıym salý 6 aıǵa belgilenedi jáne merzimi ótkennen keıin avtomatty túrde alynyp tastalady. Sondaı-aq bul shekteýlerdi kez kelgen ýaqytta alyp tastaýǵa bolady, ol úshin banktik qaryzdardy alýdan erikti túrde bas tartý qyzmetin merziminen buryn toqtatýǵa ótinim berý qajet», - dep jazdy mınıstr.
B.Mýsınniń aıtýynsha, bul fýnksıa adamdardyń qaýipsizdigi úshin qajet. Iaǵnı qazaqstandyqtar kredıtti zańsyz resimdeıtin alaıaqtardan qorǵalady.
Qazir dál osyndaı servıs Birinshi kredıttik búronyń saıtynda bar. Biraq ol aqyly. Al Elektrondy úkimet portalynda kredıt alýdan erikti túrde bas tartýǵa ótinish tegin qabyldanady.
Qaryz alýdan erikti túrde bas tartý servısi eGov.kz mobile mobıldik qosymshasynyń basty betinde, «Tanymal qyzmetter» bóliminde ornalastyrylǵan. Osyǵan uqsas qyzmet eGov.kz portalyndaǵy «Azamattarǵa» - «Keden jáne salyqtar» - «Ekonomıka jáne qarjy» bóliminde ornalastyrylǵan.
Servıs QR Sıfrlyq damý, ınovasıalar jáne aeroǵarysh ónerkásibi mınıstrligi Memlekettik kórsetiletin qyzmetter komıtetiniń, Birinshi kredıttik búronyń jáne «Ulttyq aqparattyq tehnologıalar» AQ aqparattyq júıeleriniń ıntegrasıasy arqasynda iske asyrylǵan.