QR Prezıdenttigine kandıdat Qaraqat Ábden jastar qaýymymen kezdesti.
Kezdesý barysynda orta tehnıkalyq jáne joǵary bilim, jataqhana máseleleri sıaqty jastardy tolǵandyryp júrgen suraqtar talqylandy, dep habarlaıdy «Almaty aqshamy».kz shtabtyń baspasóz qyzmetine silteme jasaı otyryp.
«Jastar – bizdiń bolashaǵymyz. Búgingi jastarǵa kómek – bul bizdiń erteńgi kúnimizge tikeleı ınvestısıa. Kezdesý barysynda biz kóptegen ózekti taqyryptardy talqyladyq. Jastardyń qoǵamnyń qoǵamdyq-saıası prosesterine belsendi qatysyp, óz ıdeıalarymen bólisetini qýantady. Olar eldegi bolyp jatqan oqıǵalarǵa beı-jaı qaramaıdy», - dedi Qaraqat Ábden.
Sonymen qatar, kezdesýde jas urpaqtyń boıynda ulttyq namys pen patrıottyq sezimdi qalyptastyrý, qyzdardyń úılesimdi tárbıesine kóńil bólýdiń mańyzdy ekeni jóninde de sóz qozǵaldy.
Q.Ábden sýısıdke qarsy ulttyq jospar qurýdy usyndy. Onyń aıtýynsha, jastar men balalar arasyndaǵy sýısıdtiń negizgi sebepteri áleýmettik máseleler jáne qoǵamdaǵy ulttyq, otbasylyq qundylyqtardyń quldyraýy bolyp tabylady. Málimetterge súıensek, 2018-2022 jj. 18 myńǵa jýyq adam ózine qol jumsaǵan. Óz-ózine qol jumsaý sany boıynsha bizdiń el álem halqy arasynda 20-orynda jáne jastar men balalar arasyndaǵy sýısıd sany boıynsha eldiń birinshi úshtigine kiredi. Bul bizden shuǵyl áreket etýdi talap etetin óte kúrdeli másele, - deıdi úmitker.
20 qarashada ótetin Prezıdent saılaýyna OSK alty kandıdatty tirkedi. Almatylyqtar saılaýshylar tiziminde ózderin https://mapalmaty.kz saıty arqyly, Open Almaty portalynda nemese Telegram Bot @almaty_sailau2022_bot arqyly tekserip, óz saılaý ýchaskesiniń mekenjaıyn bile alady. Sondaı-aq, 1315 nómirine 8.00-den 20.00-ge deıin qońyraý shalýǵa bolady.