Prezıdenttikke kandıdat Meıram Qajyken dárigerlermen densaýlyq saqtaý salasynyń ózekti máselelerin talqylady.
Aq halattylarmen kezdesýde kóterilgen máselelerdiń ishinde eńbekaqyny arttyrý, densaýlyq saqtaý salasyn qarjylandyrý, áleýmettik tólemder qozǵaldy, dep habarlaıdy «Almaty aqshamy».kz prezıdenttikke kandıdat shtabynyń baspasóz qyzmetine silteme jasap.
«Damyǵan elderde medısına salasyna degen kózqaras ózgeshe. Olarda bul salany qarjylandyrý jalpy ishki ónimniń 6 paıyzyn quraıdy. Al bizde 1,5 paıyz. Bul 4 ese tómen degen sóz. Bizdiń medısına, ásirese memlekettik qarjylandyrý esebinen jumys isteıtin uıymdar qarjylandyrylmaıdy. Al qarjylandyrý medısınalyq mekemeniń barlyq shyǵyndaryn óteýge jetkilikti bolýy tıis. Negizinde densaýlyq saqtaý salasyna reformalar júrgizý óte kúrdeli proses. Biraq kadrlar daıarlaý, ǵylymı-zertteýler júrgizý jáne t.b. baǵyttarda nátıjege jete alamyz», – dedi M.Qajyken.
Sondaı-aq, Meıram Qajyken medısına qyzmetkerlerine laıyqty eńbekaqy tóleý qajettigin, sonymen birge respýblıkalyq búdjet tarapynan densaýlyq saqtaýdyń barlyq salasyn tıisti qarjylandyrý qajettigin atap ótti.
«Bul medısınalyq salada kadrlardyń jetispeýshiligine alyp keletin ózekti másele. Medısına qyzmetkerleriniń tapshylyǵyn joıý, dárigerlerdiń áleýmettik jáne quqyqtyq qorǵalýyn arttyrý, olardyń jalaqysyn arttyrý úshin sharalar qajet. Bul meniń mindetterimniń biri», - dedi.
Meıram Qajyken memlekettik qarjylandyrýdan basqa erikti medısınalyq saqtandyrý júıesin damytý qajet, dep atap ótti. Sondaı-aq úmitker medısınalyq personal tapshylyǵy máselesin jáne kásibı jaýapkershilikti saqtandyrý júıesiniń máselelerin talqylady.
Prezıdent saılaýy 20 qarashada ótedi.