Qazaqstan ekonomıkasynyń qalaı damyp jatyr?
Bul týraly QR Premer-mınıstri Álıhan Smaıylov Astanada ótip jatqan «AMANAT» partıasynyń barlyq deńgeıdegi máslıhat depýtattarynyń respýblıkalyq forýmynda aıtty, dep habarlaıdy Almaty-akshamy.kz Úkimettiń baspasóz qyzmetine silteme jasap.
Úkimet basshysy búgingi tańda respýblıka ekonomıkasy syrtqy keleńsizdikterge beıimdelip, turaqty damý jolyna túskenin atap ótti. Atap aıtqanda, ótken jyldyń qorytyndysy boıynsha el ekonomıkasy 3,3%-ǵa ósken. Bul rette jumys istep turǵan shaǵyn jáne orta kásipkerlik nysandarynyń sany 27%-ǵa kóbeıdi, osy sektorda jumyspen qamtylǵandar sany 18%-ǵa ósip, 4,1 mln-ǵa jetti, al ekonomıkadaǵy SHOB úlesi 33%-dan 36,5%-ǵa deıin ulǵaıdy.
«Qabyldanyp jatqan sharalar bıyl turaqty ekonomıkalyq ósimdi qamtamasyz etýge múmkindik berdi. 5 aıda jalpy ishki ónimniń naqty ósýi 4,5%-dy qurady. Barlyq negizgi sala boıynsha oń dınamıka qalyptasyp otyr», dedi Álıhan Smaıylov.
Naqty ósim qurylys salasynda 12%-dy, saýda-sattyqta 10%-dy, baılanys salasynda 9%-dy, kólik salasy boıynsha 7%-dy, óńdeý ónerkásibinde 3,3%-dy qurady.
«Ekonomıkalyq ósim ınvestısıalarmen tikeleı baılanysty. Negizgi kapıtalǵa salynǵan ınvestısıalardyń naqty kólemi 5 aıda 17,2%-ǵa ósti. Bıyl biz ekonomıkanyń ósýin 4,5-5%, al orta merzimdi bolashaqta keminde 6% deńgeıinde kózdep otyrmyz», dedi Premer-mınıstr.
Sonymen qatar Álıhan Smaıylov Úkimet pen jergilikti atqarýshy organdardyń negizgi mindetteriniń biri azyq-túlik baǵasyn turaqtandyrý ekenin atap ótti. Ol úshin búginde aýyl sharýashylyǵy taýaryn óndirýshilermen forvardtyq kelisim-sharttar jasasýdy, azyq-túlik boıynsha turaqtandyrý qorlarynyń belsendi jumysyn, kókónis qoımalarynyń qurylysyn, monopolıaǵa qarsy jáne syrtqy saýdany retteýdi kózdeıtin ınflásıany baqylaý jáne tómendetý jónindegi sharalar kesheni iske asyrylyp jatyr.
«Nátıjesinde osy jyldyń mamyr aıynda jyldyq ınflásıa 21%-dan 15,9%-ǵa deıin baıaýlady. Bizdiń aldymyzda jyl sońyna deıin ınflásıany 2 ese tómendetý mindeti tur», dedi Úkimet basshysy.
Premer-mınıstr Memleket basshysynyń Saılaýaldy tuǵyrnamasyn jáne «AMANAT» partıasynyń baǵdarlamasyn iske asyrý Úkimet jumysynyń negizi ekenin atap ótti.
«Osy baǵdarlamalyq qujattardy tıimdi iske asyrý halyqtyń ómir súrý deńgeıin arttyrýǵa múmkindik beredi. Aldymyzdaǵy maqsattarǵa qol jetkizý úshin qajetti resýrstardyń barlyǵy bar. Qoıylǵan mindetterge qol jetkizý máslıhattardyń da belsendi qatysýyn talap etedi», dedi Álıhan Smaıylov.