Kentaý qalasynda ornalasqan "Rızyq-Raýany" fast-fýd ortalyǵynda tamaqtan ýlanǵandar sany 92-ge jetti.
Bul týraly Túrkistan oblysynyń Sanıtarıalyq-epıdemıologıalyq baqylaý departamentiniń basshysynyń orynbasary Asqar Iskakov málimdedi, dep habarlaıdy Almaty-akshamy.kz Ulysmedia.kz-ke silteme jasap.
Atalǵan tamaqtaný ornynda jappaı ýlaný jaǵdaıy osymen 3-shi ret tirkelip otyr.
Qoǵamdyq tamaqtaný ornynyń ıesi kúdikti retinde tanylyp, onyń is áreketinde qylmystyq quqyq buzýshylyqtyń quramy bar dep tanylǵan. Degenmen, jábirlenýshilermen tatýlasýyna baılanysty, qylmystyq is toqtatylǵandyǵy jóninde Kentaý qalalyq polısıa bólimi qaýly shyǵarǵan.
«Nysan qyzmetkerleri aldyn ala profılaktıkalyq medısınalyq tekserýden tolyq ótpegen. Jumys jasaıtyn 20 qyzmetkerdiń tek 12-de ǵana medısınalyq kitapshalary bar. Shıkizat pen ónimniń qaýipsizdigin kýálandyratyn qujattary tolyq emes, ónimderdi saqtaý kezinde olardyń taýarlyq kórshilestigi saqtalmaǵan, ıaǵnı et ónimderi, qus eti ónimderi, sút ónimderi, kókónister men jemister, barlyǵy bir tońazytqyshta aralasa saqtalǵan. Qyzmetkerlerdiń jeke jáne arnaıy kıimderin, jeke zattaryn saqtaýǵa arnalǵan oryn qarastyrylmaǵan. Jumyrtqany saqtaýǵa, jýyp óńdeýge arnalǵan arnaıy ydys bólinbegen, ónimderdiń jaramdylyq merzimderi ótken. Zerthanalyq zertteýge alynǵan synamalar jumys ústinde», delingen Túrkistan oblysy sanıtarıalyq-epıdemıologıalyq baqylaý departamentiniń baspasóz qyzmeti taratqan aqparatta.