Eriktilerge jyl basynan beri 1600 adam habarlasyp, qol ushyn sozýdy suraǵan.
Resmı aqparattar boıynsha, elimizde 18 myńǵa jýyq nashaqor tirkelgen. Olardyń basym bóligi – jastar men kámeletke tolmaǵandar, dep habarlaıdy Alamaty-akshamy,z Qazaqstan.tv-ǵa silteme jasap.
Aıbek Manapovtyń nashaqorlyq dertinen aıyqqanyna eki jylǵa jýyqtapty. Degenmen, áli kúnge em-domyn qabyldap, dárigerler men psıhologtardyń baqylaýynda júr. Óıtkeni jeke tragedıasynyń qaıtalanýynan qorqady. Buǵan deıin ol 13 jyl toqtaýsyz esirtki qabyldaǵan.
«Men 15 jasymnan esirtki qabyldaı bastadym. Al 25 jasymda sıntetıkalyq esirtkige kóshtim. Psıhotroptyq zattardyń bir jamany adamdy lezde táýeldi etip qoıady. Saldarynan otbasymnan, dostarym men jıǵan-tergenmnen túgel aıyryldym. Osydan eki jyl buryn «Narkostop» ortalyǵy jaıly estip, kómek suradym. Sodan beri dertimnen aıyǵyp kelemin», - deıdi qala turǵyny Aıbek Manapov.
Resmı aqparat boıynsha Almatyda esirtkige táýeldi, kámeletke tolmaǵandardyń sany nebary - 12. Bul resmı tirkelgenderi ǵana deıdi mamandar. Psıhotroptyq zattardyń qurbanyna aınalǵandardyń basym kópshiligi jeke klınıkalarǵa júginedi nemese arnaıy koll ortalyqtarǵa habarlasady eken.
«Bıyl 1600 qońyraý kelip tústi Call-ortalyqqa. Olar tek koll ortalyqqa emes, vatsap, ınstagram jelilerine jazady. Kóbisi ol ata-analar. Óıtkeni esirtkige táýeldilerdiń ózderi óte sırek habarlasady. Lomkamen habarlasatyndar bar. Bizdiń mamandar bir saǵat, eki saǵat sóılesip oflaıyn kezdesýge tartady», - deıdi erikti, áleýmettik joa jetekshisi Nurjan Jaqypov.
Ortalyqqa habarlasqandar tegin emdelý úshin ońaltý ortalyqtaryna jiberiledi. Dese de, emdelip shyqqandardyń barlyǵy birdeı qalypty ómirge oralmaıdy eken. Óıtkeni búgingi tańda esirtkige qol jetkizý tym ońaı. Tipti, quramynda esirtkisi bar preparattar dárihanalarda ashyq túrde satyla beredi.
«Jyl basynan osyndaı 10 dárihana anyqtaldy. Ákimshilik kodekstiń 426 babynyń talaptaryn buzǵany úshin sol dárihanalardyń ıeleri ákimshilik jaýapkershilikke tartylǵan edi. Iaǵnı, dárigerdiń ruqsatynsyz quramynda narkotıkalyq dárilerdi jibergeni úshin», - deıdi Almaty qalasy PD resmı ókili Saltanat Ázárbek.
Úsh jyl buryn jumysyn bastaǵan «Narkostop» jobasynda 1000-ǵa jýyq erikti bar. Olardyń kómegimen eki jyldyń ishinde esirtkige táýeldi 27 adam ońaltý ortalyǵyna jiberilip, sonyń 15-i dertinen tolyǵymen aıyǵyp shyqqan.