Kórnekti memleket jáne qoǵam qaıratkeri, Uly Otan soǵysynyń ardageri, QazKSR-nyń eńbek sińirgen mádenıet qyzmetkeri Roza Shamjanovanyń qurmetine memorıaldyq eskertkish-taqta qoıyldy.
Ol 1942 jyly QazMÝ-de oqyp júrgen kezinde óz erkimen maıdanǵa attanyp, 33-baılanys bólimshesinde komandır bolǵan. Soǵystan keıin Máskeý halyqaralyq qatynastar ınstıtýtyn bitirgen. QazKSR Ǵylym akademıasynyń Tarıh, arheologıa jáne etnografıa ınstıtýtynda ǵylymı qyzmetker, 1951–1953 j.j. Búkilodaqtyq shet eldermen mádenı baılanys qoǵamynyń Qazaq bólimshesi ókiliniń orynbasary bolǵan. 20 jyldan astam ýaqyt Qazaq dostastyq jáne sheteldermen baılanys qoǵamyn basqarǵan.
«Roza apaımen 7 jyldaı eńbek atqardym. Ol kisiniń tabandylyǵyna qaıran qalatyn edik. Birge shetelderde Qazaqstannyń mádenı kúnderin uıymdastyratyn edik. Roza Shamjanqyzy kishkentaı kezinen jetimder úıinde ósken.
Sol kezderde mal sharýashylyǵyn damytýǵa atsalysyp, mal jaıyp, buzaýlardy baǵýǵa kómektesken. 13 jasynda Qazaqstannan barǵan delegasıa quramynda, 1936 jyly Máskeý qalasynda ótken Búkilodaqtyq mal sharýashylyǵynyń ozat jumysshylary jınalysyna qatysqan. Erik- jigeriniń arqasynda 2 jylda bir ret shetelge mádenıetimiz, ulttyq bolmysymyzdy, ádebıetimizdi tanytýǵa ólsheýsiz úles qosty», – deıdi QR eńbek sińirgen dıplomaty, profesor Qaırat Isaǵalıev.
İs-sharanyń ótýine Almaty qalasynyń mádenıet basqarmasy muryndyq boldy. Memorıaldyq taqtanyń saltanatty ashylý rásimine týystary, dos-jarandary, memleket jáne qoǵam qaıratkerleri, shákirtteri qatysty.
«Anam jumysta qatal bolǵanmen, ómirde kishipeıil, adamdarǵa janashyr edi. Eńbekke jastaıymyzdan aralastyrdy. Ol óz isine adal adam edi. Elimizdiń kóptegen qoǵam qaıratkerlerimen aralasty, álemge qazaqty tanytty. Soǵysty da, joqshylyqty da kórdi. Otbasyndaǵy 4 baladan men ǵana qaldym qazir. Eskertkish-taqtany qoıýǵa, ornatýǵa úles qosqan jandarǵa alǵysymdy bildiremin», – deıdi uly Erlan Sádýaqasov.
Tynymsyz eńbek pen adamgershilik qasıetteriniń arqasynda Roza Shamjanqyzy el ardaqtysyna, halqynyń qalaýly tulǵasyna aınaldy. Sheteldermen mádenı baılanysty damytýǵa qosqan zor úlesi úshin Qazaqstan, Bolgarıa, Mońǵolıa, Rýmynıa, Chehoslovakıa, Germanıa, taǵy da basqa elderdiń joǵary nagradalarymen marapattalǵan.