Almaty qalasynyń Túrksib aýdanyndaǵy Azamattyq hal aktilerin tirkeý bóliminde erekshe neke qıý rásimi ótti. Almatyda týyp-ósken erli-zaıypty Valerıı jáne Zoıa Ahmýrtovtar shańyraq qurǵandaryna 55 jyl tolǵan mereıli gaýhar toılaryn toılady.
Jarty ǵasyrdan astam qol ustasyp, otbasylyq ómirdi birge súrip kele jatqan baqytty januıaǵa Túrksib aýdanyndaǵy Azamattyq hal aktilerin tirkeý bóliminiń qyzmetkerleri jáne ákimdik ókilderi erekshe qurmet kórsetip, jubaılardyń neke qıý rásimin uıymdastyrdy. Jubaılarǵa Qazaqstan Respýblıkasynyń jańa úlgidegi neke kýáligi tabys etildi. Túrksib aýdany ákimdiginiń Ardagerler keńesiniń tóraǵasy Ǵalıa Asqarqyzy mereıtoı ıelerin quttyqtap, gúl shoqtary men estelik syılyqtaryn berdi.
Saltanatty sharaǵa Valerıı men Zoıa Ahmýrtovtardyń uly Evgenıı, qyzy Natalá jáne nemereleri, otbasylyq dostary men et-jaqyndary qatysty. Olar ádemi juptyń neke júzikterimen almasqan sátine kýá boldy. Áýlettegi taǵy bir qýanyshty jańalyq - 2 aı buryn ataı men ájeıdiń shóberesi Maksım dúnıege keldi.
«Osydan 55 jyl buryn aq kóılek kıip, qalyńdyq atanǵan kezim esime túsip, kózime jas kelip tur. Órimdeı jap-jas edik. Biz bir qalada, bir aýlada óstik. Valerıı men meniń aǵam jaqsy dos boldy. 20 jasymda týǵan kún keshinde bir-birimizge sezimimiz oıanyp, sózimiz jarasty, mine, sodan beri birgemiz», – deıdi Zoıa ájeı.
Valerıı Ahmýrtov áskerı boryshyn ótkep kelgennen keıin, 1968 jyly 24 jasynda súıkimdi arýǵa ǵashyq bolyp, máńgilik birge bolýǵa usynys jasaıdy. Ózi symbatty, sportty janyna serik etken, atqa mingendi jaqsy kóretin, eńbekqor, gıtarada sheber oınaıtyn ónerli jigitke turmysqa shyǵýǵa Zoıa arý da qarsy bolmapty.
«55 jyldyq otbasylyq ómirde jarqyn, baqytty sátterimiz kóp boldy. Biraq eki adamnyń bir shańyraq astynda tatý-tátti ómir súrýi ońaı emes. Sondyqtan búginde otbasy quryp jatqan jas jubaılarǵa tózim, sabyrlylyq tileımin. Mahabbatty aıalaý úshin aldymen bir-birine degen syılastyq kerek. Bir otbasynda «meniki», «seniki» degen bolmaıdy, bári ortaq. Bir-birin keshire biletin, bir - biriniń tipti kemshiligin de jaqsy kóretin jubaılar baqytty bolady», – deıdi Valerıı Ahmýrtov.