Bul - ǵalamshardaǵy eń aýqymdy ekologıalyq aksıa.
Qazaqstanda «Jer saǵaty» ekologıalyq aksıasy 13-shi ret ótedi, dep habarlaıdy Almaty-akshamy.kz Almaty.tv silteme jasap.
Qazaqstannyń ekologıalyq uıymdary qaýymdastyǵynyń basqarma tóraǵasy Aıgúl Soloveva bıyl 26 naýryzda el turǵyndaryna bir saǵatqa – saǵat 20.30-dan 21.30-ǵa deıin elektr qýatyn paıdalanýdy toqtatyp, ekologıany oılaýdy usyndy. Onyń aıtýynsha, «Jer saǵaty» – bul ǵalamshardaǵy eń aýqymdy ekologıalyq aksıa.
«Biz barsha qazaqstandyqty birigip, tabıǵatqa tıgizetin zıanymyz týraly kem degende bir saǵat oılanýǵa shaqyramyz», - dedi Soloveva.
Aksıanyń basty maqsaty – árbir adamǵa qorshaǵan ortany saqtaýǵa óz úlesin qosýǵa múmkindigi bar ekenin jetkizý. Aksıaǵa ádette azamattar, kompanıalar jáne Úkimet qatysady. Jaryqty óshire otyryp, olar ózderiniń ómir saltyn «jasyldandyrýǵa» daıyn ekenin bildiredi.
«Eger qazirgi úrdis saqtalatyn bolsa, onda 2050 jylǵa qaraı adamdarǵa energıaǵa, sýǵa jáne azyq-túlikke degen qajettiligin qanaǵattandyryp, qaldyqtardy saqtaý úshin ekinshi ǵalamshar qajet bolady. Biz barsha qazaqstandyqty osy aksıaǵa qosylýǵa jáne kúndelikti ádetin ózgertýge, energıa men jylýdy únemdeýge, sýdy tıimdi paıdalanýǵa, qaldyqtardy óńdep, kádege jaratýǵa shaqyramyz», - dep túıindedi Soloveva.
Dúnıejúzilik jabaıy tabıǵat qory (WWF) Ortalyq Azıa baǵdarlamasynyń dırektory Grıgorıı Mazmanánstyń aıtýynsha, aksıaǵa qatysýshylardyń sany jyldan jylǵa artyp keledi.
«Aksıa barǵan saıyn aýqymdy sıpatqa ıe bolýda. Biz búkil álemde bir ýaqytta jaryq sónetinin kúnge jetemiz degen oıdamyn», - dep atap ótti ol.