Shaharda túrli baǵytta 3611 sport kesheni bar.
Qalalyq sport basqarmasynyń janynan arnaıy monıtorıńtik top quryldy. Maqsat – megapolıste nátıjesiz sport túrlerin qysqartyp, ornyna qajetti degen seksıalardyń saǵatyn kóbeıtý. Bul týraly búgin qalalyq ákimdikte ótken jıyn barysynda belgili boldy, dep habarlaıdy Almaty-akshamy.kz Almaty.tv silteme jasap.
"Júıeli jumys almatylyq sportshylardyń bir baǵyt boıynsha turaqty túrde damýyna yqpal etedi", - deıdi sport basqarmasynyń basshysy. Keńeste qaladaǵy sporttyq-mádenı sharalardyń sanyn azaıtý máselesi de sóz boldy. Máselen, halyqaralyq týrnırlerdi qosqanda Almatynyń ózinde ótken jyly 1200-ge jýyq shara ótken. Buǵan jumsalǵan búdjettiń qyrýar qarjysyn jasóspirimderdiń sport seksıalaryna jumsaý kerektigi usynyldy. Sonymen qatar kópshilik qazir Beıjińde ótip jatqan XIII Qysqy Paralımpıada oıyndarynda elimizdiń namysyn qorǵap jatqandardyń ishinde almatylyq sportshynyń bolmaǵany syn dedi. Búgin jumysyn bastaıtyn monıtorıńtik top músheleri osy syndy máselelerdiń aldyn alý jolynda jumys istemek.
«Bıyl qaladaǵy ortalyq stadıondy kúrdeli jóndeýden ótkizýdi josparlap otyrmyz. Kúrdeli jumys istep qana qoımaı, oǵan qosymsha alań salynady. Sondaı-aq 2022-2024 jyldarǵa sporttyq jabdyqtardy jańǵyrtý josparlanǵan. Nátıjesinde qaladaǵy sport mektepterine zamanaýı quraldar satyp alynady. Bul sportshylardyń jattyǵý sapasynyń artýyna yqpal etedi», – dedi sport basqarmasynyń basshysy Rústem Baıseıitov.
Aıta ketken jón, búginde Almatyda túrli baǵytta 3611 sport kesheni bar. Odan bólek, 3 aýdanda jańa ǵımarat salynyp jatyr. Al "Kemel" shaǵynaýdanyndaǵy boı kóterip jatqan deneshynyqtyrý-saýyqtyrý kesheni jýyrda paıdalanýǵa berilmek. Onda jekpe-jek sport túrleri men kórkem gımnastıka zaldary bar. Odan bólek, jyl sońyna deıin tenıs ortalyǵynyń qurylysy aıaqtalmaq.