Birlik, yntymaq – halqymyzǵa qashannan-aq uran bolǵan uly uǵym. Jaý jaǵadan alǵanda jaqyny etekten tartyp, ózara alaýyzdyqtan talaı márte esesi ketken el úshin odan mańyzdy, odan baǵaly nárse kemde-kem. Abyz babalardyń bul turǵydaǵy támsilderi ańyzǵa aınalyp, urpaqtan-urpaqqa amanat etilgeni de sodan.
Eskiden jetken sondaı bir esti áńgime birliktiń mańyzyn bylaısha aıshyqtaıtyn-dy: Tóle bıdiń jas kezi bolsa kerek. Ol birde Ánet babadan bata alýǵa keledi. Sóıtip, dala danyshpanynan: «Baba, birliktiń belgisi qandaı?» dep suraıdy. Qarıa jaýap qaıtarýǵa asyqpaıdy. Áýeli bir býma shybyqty qolyna ustatyp: «Balam, mynany syndyrshy!» deıdi. Tóle býylǵan kúıdegi solqyldaq shybyqty ary ıip, beri ıip, syndyra almaıdy. Sodan soń qart baba shybyqtardy býmadan sýyryp, Tóleniń qolyna bir-birden ustatady da: «Al endi kórshi» deıdi. Jalǵyz-jarym shybyqtardy Tóle op-ońaı syndyrady. Ánet baba: «Budan ne túsindiń, balam?» – deıdi. «Birligi bekem jurtty jaý almaıdy» degenińiz ǵoı», – dep jaýap beredi jas Tóle. Sonda: «Bárekeldi, ulym, eldi eń aldymen aýyzbirshilikke, yntymaqqa shaqyra bil. «Baq, qaıda barasyń – yntymaqqa baramyn» degenniń mánisi osy, – depti Ánet baba.
Sol sıaqty, qazaq kınosynyń injý-marjany «Qyz Jibek» fılmindegi bul másele jerine jetkizile aıtylatyn epızod ta esimizde. Rýaralyq teke-tireste qarsylasyn tize búktirip, jeńisine marqaıǵan shekti bıleýshisine: ««Eki momyn talassa – tentekke jem. Osyny oılaǵan kim bar?! Kúnde – qyrǵyn, kúnde – ıtjyǵys... Kimge – baq, kimge – sor?!» dep saýal tastap, «Aqjaıyqtyń qyrǵynyn kórgem joq. Shaqyrǵan bolsań estigem joq. Biraq estigen bolsam keler me em, kelmes pe em? Kelsem – «Keń dalaǵa sen de sıasyń! Sen de sıasyń! Sender de sıasyńdar! Toqtat qyrǵyndy!» deýge keler em. Onyma qulaq aspasań – kelmeı-aq qalar em», – demeýshi me edi Tólegen... Jas batyrdyń sondaǵy: «Bolmashyǵa ózdi-ózimiz kúnde qyrylysyp jatqanda syrt kóz bizdi baqpaı ma eken?! Qansyraǵan elimizge qyzyqpaı ma eken?! Qysyq kózdi, qıǵash qabaq kórshiń bar bir búıirińde. Tistese-tistese baqsynyń qumalaǵyndaı shashylyp ketken elimiz bar. Kúnniń shyǵysynan batysyna deıin sozylǵan ulan-baıtaq jerimiz bar. Syımaı júrsek eken-aý... Syıysa almaı júrmiz ǵoı!..» degen ýájine toqtaǵan Syrlybaıdyń: «El birligi» degen sóz uıalaıdy ishime...» deıtini bar. Sóıtip, qarsy aldynda mataýly kúıinde tizerlep otyrǵan qos tutqyn qarıany tórge shaqyryp, shapan jaýyp, bitiskendiktiń belgisin kórsetedi. Negizi, «Qyz Jibek» – mahabbat jyry ǵana emes, yntymaq pen birlikti, eldikti dáriptegen dara týyndy. Oǵan arqaý bolǵan eldik, birlik máselesi – tini úzilmegen ómirsheń ózek.
Kóneden kele jatqan qaı támsilge qulaq túrsek te, yrys pen baqyt yntymaǵy zor, birligi bekem elge qonatynyn, kúlli ıgilik, jaqsylyq ataýly ózara tatý, uıymshyl, ujymshyl jurtqa turaqtaıtynyn baıandaıdy. «Baılyq – baılyq emes, birlik – baılyq», «altaý ala bolsa aýyzdaǵy ketedi, tórteý túgel bolsa tóbedegi keledi» dep, el-jurtty, aǵaıyn-týysty judyryqtaı jumylýǵa úndeýmen bolǵan ata-babalarymyz yntymaq pen birliktiń qadirin jete túsingen, barynsha baǵamdaı bilgen.
Qaı zamanda da mańyzyn joǵaltpaǵan birlik uǵymy búgin tipti ózekti. El men jerdiń negizgi tutqasy, memleket qurýshy ult retinde qazaq búgin óz arasyndaǵy ǵana emes, búkil eldegi yntymaqqa, birlikke jaýapty. Ózegi myqty ult qana ózgelerdi óz mańaıyna uıystyra, toptastyra alady desek, bul bizge eki ese jaýapkershilik júkteıtinin sezine bilgenimiz jón.
Kórip júrgenimizdeı, búginde dúnıe dúrbeleńge toly. Jer-jerde, el-elde sol baıaǵy: «kúnde – qyrǵyn, kúnde – ıtjyǵys». Al sodan shynymen de: «kimge – baq, kimge – sor?!» Jetpeı jatqan nárse joq. Qýaryp, sýalyp bara jatqan tek qana – qaıyrym, meıirim bulaǵy ǵoı. Al onyń saldary – «talasqan eki momynnyń tentekke jem bolǵany».