Búgin – Qazaqstan halqynyń birligi kúni.
Bul mereke 1995 jyldyń 18 qazanynda bekitilgen, dep habarlaıdy Almaty-akshamy.kz
Bastapqyda bul kún «Qazaqstan halyqtarynyń birligi kúni» dep ataldy. Ol kezde Qazaqstan halqy assambleıasynyń ataýynda da kóptik jalǵaý boldy. Keıinirek ózgeris engizilip, kóptik jalǵaý alyndy. Onyń maqsaty – Qazaqstan halqynyń birtutas el ekenin kórsetý.
Elimizde 1 mamyrǵa deıin jyl saıyn Qazaqstan halqy Assambleıasynyń otyrysy ótedi. Bıyl uıymnyń XXXIIİ cessıasy 25 sáýirde ótti. Jıynǵa memleket basshysy Qasym-Jomart Toqaev qatysty.
Memleket basshysy buǵan deıin uıymnyń jumysy týraly atap ótken bolatyn.
«Qazaqstan halqy Assambleıasy – birligimizdi nyǵaıtýǵa qyzmet etetin biregeı qurylym. Assambleıa qasıetti qazaq jerin meken etken barsha etnosty uıystyryp otyr. Onda eńbek etip júrgen azamattardy birliktiń elshisi deýge bolady», - dedi Toqaev.
Sondaı-aq elimizde ultaralyq birlik pen dostyqty nyǵaıtýǵa arnalǵan taǵy bir data bar. Ol – Alǵys aıtý kúni. Bul merekeni assambleıa qurylǵan kúni – 1 naýryzda merekelenedi.
Merekeniń basty maqsatynyń biri – óskeleń urpaqty dostyq, bir-birine degen qurmet pen toleranttylyqqa, otansúıgishtikke tárbıeleý, Qazaqstanda etnıkaralyq kelisim men ultaralyq qarym-qatynasty nyǵaıtý.
Ulttyq statısıka búrosynyń 2024 jyldyń basyndaǵy statısıkasy boıynsha, Qazaqstanda halyq sany 20 033 842 adam. Elimizdegi halyqtyń 70 paıyzdan astamy (14 220 321) qazaq ultynan turady.
Qazaqstan halqynyń jartysynan astamy (12 451 192 adam) qalada turady, aýyldarda turatyn adamdardyń sany – 7 582 650.
2024 jyl basyna ulttyq quramy:
Qazaqtar – 14 220 321 adam (71,0%)
Orystar - 2 983 317 adam (14,9%)
Ózbekter - 660 564 adam (3,3%)
Ýkraınder - 375 914 (1,8%)
Uıǵyrlar - 301 584 (1,5%)
Nemister - 224 343 (1,1%)
Tatarlar - 219 201 (1,0%)
Ázirbaıjandar - 152 847 (0,7%)
Koreıler - 120 262 (0,6%)
Túrikter - 90 015 (0,4%)
Dúngender- 83 948 (0,4%)
Belarýstar - 75 048 (0,3%)
Tájikter- 55 873 (0,2%)
Kúrdter- 50 264 (0,2%)
Qyrǵyzdar- 38 596 (0,1%)
Ultyn kórsetpegender - 67 263 (0,3%)
Basqa etnostar -52 615 (0,2%)