Úkimet basshysynyń birinshi orynbasary Roman Sklár Qazaqstan áýe kompanıalary múgedek jandarǵa qandaı jeńildik usynatynyn aıtty, dep habarlaıdy Almaty-akshamy.kz.
«Qazirgi ýaqytta Qazaqstan Respýblıkasynyń qoldanystaǵy zańnamasynda 2 jastan 15 jasqa deıingi ishki reısterde jáne 2 jastan 12 jasqa deıingi halyqaralyq reısterde kámeletke tolmaǵan balalarǵa 50% jeńildik kózdelgen. Sondaı-aq 2 jasqa deıingi balalardy halyqaralyq jáne ishki reısterde jeke oryn bermeı tasymaldaý tegin júzege asyrylady», - dep atap ótti Roman Sklár Májilis depýtattarynyń saýalyna bergen jaýabynda.
Mınıstrliktiń suraýyna oraı, áýe kompanıalary kelesideı jaýap qaıtarǵan:
SCAT: Avıakompanıanyń ishki turaqty reısterinde (sýbsıdıalanǵan reısterdi qospaǵanda) jylyna 1 ret múgedek balalar men İ toptaǵy múgedekter úshin tarıften 100% jeńildik, sondaı-aq İİ toptaǵy múgedekter úshin 50% jeńildik beriledi. Bul rette jolaýshylar áýejaı alymdary men avıabıletti resimdegeni úshin alymdardy tóleıdi. Erip júretin adamdarǵa jeńildikter qarastyrylmaǵan.
Qazaq Air: Múgedektigi bar adamdarǵa áýe saparlaryna jeńildikter berý máselesi barlyq rastaıtyn qujattardy usynǵan kezde jeke tártippen qaralady. Sonymen qatar múgedek balaǵa tarıf qunynan 100% jeńildik jáne ilesip júretin adamǵa sol tarıften 50% jeńildik beriledi.
Air Astana: 60 jastan asqan jolaýshylarǵa, 12 jastan 25 jasqa deıingi jastarǵa jáne UOS ardagerlerine jeńildikter kózdelgen.