Qańtar aıyndaǵy UBT bastalǵannan beri 53 myńnan astam adam test tapsyrdy.
Onyń ishinde talapkerlerdiń 73,6 paıyzy qazaq tilinde, 26,3 prosenti orys tilinde, 35 adam aǵylshyn tilinde testileýden ótti, almaty-akshamy.kz.
UBT bastalǵaly shekti baldy 73%-ǵa jýyq talapker jınady. Ortasha balǵa keletin bolsaq, ol 65 baldy qurady. Eń joǵary bal – 134.
Testke qatysýshylardyń basym bóligi «Matematıka-Fızıka» jáne «Bıologıa-Hımıa» kombınasıalaryn tańdaǵan. Sondaı-aq, TOP-3 qataryna talapkerlerdiń 11% tańdaǵan «Matematıka-Informatıka» kombınasıasy kirdi. Eń az tańdalǵan kombınasıa – «Hımıa-Fızıka», ony 59 adam tapsyrǵan.
«Búgingi tańda 63 ereje buzýshylyq anyqtalǵan. Onyń ishinde 43 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorıadan 20 adam shyǵarylyp, olardyń nátıjeleri joıyldy. Bógde tulǵalar anyqtalǵan joq», - dep atap ótti QR ǴJBM Ulttyq testileý ortalyǵynyń dırektory Rýslan Emelbaev.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa eki aptada 158 talapker qatysqanyn aıta ketken jón.
Talapkerler testileý aıaqtalǵannan keıin 30 mınýt ishinde apelásıaǵa bere alady. Sertıfıkat apelásıa týraly sheshim qabyldanǵannan keıin testilenýshiniń jeke kabınetinde qoljetimdi bolady.
Aıta ketý kerek, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.