Qazaq tilinde erkin túsinetin tuńǵysh ChatGPT ázirlenedi.
Ǵylym jáne joǵary bilim mınıstri Saıasat Nurbek Gýmılev atyndaǵy Eýrazıalyq ýnıversıtette ótken forýmda mınıstrlik quramynda Jasandy ıntellekt komıteti qurylatynyn qulaqqaǵys etti, dep habarlaıdy almaty-akshamy.kz.
"Al byltyrǵy damý prosesin ǵylymı orta "oıyn jyly" dep atap ketti. Bári oınady, kórdi, tańǵaldy. Endi bıyl salmaqty áńgime bolatyn túri bar. Jasandy ıntellekt salasyna búkil alpaýyt kompanıalar kirisip ketti, trıllıondaǵan ınvestısıa quıyla bastady. Osy sońǵy 5 jyldyń ishinde 27 memleket ózderiniń ulttyq jasandy ıntellekt strategıalaryn qabyldady", – dedi Saıasat Nurbek.
Onyń aıtýynsha, mundaı strategıany Qazaqstan bıyl qabyldady. Oǵan sáıkes, mınıstrlik quramynda Jasandy ıntellekt boıynsha arnaıy komıtet qurylady.
"Bizdiń ınstıtýttarymyz ázirlegen aýqymdy til modeli shyǵady. Ol modeldi sýperkompúterde jattyqtyramyz da, qazaqsha túsinetin ózimizdiń tuńǵysh ChatGPT paıda bolady. Qazir búkil arab elderinde ózderiniń til modelderin jasap jatyr. Olarǵa jeńildeý. Óıtkeni, arab tilinde shyqqan ǵylymı eńbek, jazba ádebı mádenıet kóp. Ókinishke qaraı, ózimizdi qansha maqtasaq ta, bizde ondaı myńdaǵan jyldyq kitaphanalar joq. Mádenıetimiz de, órkenıetimiz de aýyzsha. Sondyqtan Mádenıet jáne aqparat mınıstrligimen birlesip búkil BAQ-tyń, kınoqordyń muraǵaty negizinde osy baǵytta jumys istep jatyrmyz. Sony jeńildetý úshin Oksford ýnıversıteti kómektesti", – dedi mınıstr.