Barlyǵy 140 mlrd teńge qarastyrylǵan.
Kóktemgi egis jumystaryn qamtamasyz etý úshin Úkimet qajetti sharalardy qabyldady, dep habarlaıdy Almaty-akshamy.kz Úkimettiń resmı kanalyna silteme jasap.
Aldaǵy naýqanǵa barlyǵy 140 mlrd teńge qarastyrylǵan.
Jeńildetilgen baǵamen 413 myń tonna dızel otyny bólindi.
Forvardtyq satyp alýǵa 20 mlrd teńge jáne sýbsıdıalar túrinde 87 mlrd teńge qarastyrylǵan.
«Memlekettik qoldaý fermerler tarapynan da belgili bir sharttardy oryndaýdy talap etedi. Bul – agrotehnologıalardy qatań saqtaý jáne tyńaıtqyshtardy ýaqytyly qoldaný», — dep atap ótti Premer-Mınıstr Álıhan Smaıylov.
Úkimet basshysy respýblıka boıynsha tyńaıtqyshtardy qoldaný kólemi ǵylymı qajettiliktiń nebári 26%-yn quraıtyndyǵyna nazar aýdardy. Al elde tyńaıtqysh óndiretin 12 zaýyt jumys isteıdi. Memleket ónimdi satyp alý úshin fermerlerge sýbsıdıa beredi.
«Óndiristiń bárin, eń aldymen, otandyq naryqqa baǵyttaý qajet. Sarapshylardyń baǵalaýy boıynsha mıneraldy tyńaıtqyshtardyń jetkilikti deńgeıde sebilmeı qalýynan bizdiń dıqandarymyz 10 mln tonnaǵa jýyq joǵary sapaly bıdaı óndirý múmkindiginen aıyrylyp otyr. Bul – jınalǵan ónimniń jartysyna jýyq», — dedi Premer-Mınıstr.
Sonymen birge:
topyraqtyń tozýy men egis alqaptaryn aramshópterdiń basyp ketýi de ónimniń sapasy men kólemine keri áser etip otyr;
sýdy kóp qajet etetin daqyldardyń alqaptaryn azaıtý tetikteri durys jolǵa qoıylmaı keledi;
fermerler arasynda túsindirý jumystary durys júrgizilmegen. Olarǵa jumys júrgizýdiń basqa, balama nusqalary usynylmaǵan.
Osyǵan baılanysty Aýyl sharýashylyǵy mınıstrligine múddeli memlekettik organdarmen jáne óńir ákimdikterimen birlesip osy baǵyttaǵy jumysty kúsheıtý tapsyryldy.
Jeńildikti dızel otynyn bólý jumystary da erekshe baqylaýda bolýy tıis.
«Alyp-satý men qoldan jasalǵan tapshylyqqa jol bermeý kerek. Bólingen dızel otynyn basqa jaqqa «jasyryn satatyn» operatorlarǵa barynsha qatań shara qoldaný kerek», — dedi Álıhan Smaıylov.