Úkimet tarapynan qandaı sharalar qolǵa alynady?
Densaýlyq saqtaý mınıstri Ajar Ǵınıat óz sózinde elimizde maýsym aıynyń ortasynan bastap koronavırýs ınfeksıasyn juqtyrǵandar sanynyń artqanyn atap ótti, dep habarlaıdy Almaty-akshamy.kz
Premer-Mınıstrdiń orynbasary Eraly Toǵjanovtyń tóraǵalyǵymen Qazaqstan Respýblıkasynyń aýmaǵynda koronavırýs ınfeksıasy taralýynyń aldyn alý jónindegi vedomstvoaralyq komısıanyń otyrysy ótti. Komısıa jumysyna ortalyq memlekettik organdardyń ókilderi, oblys ákimderi jáne «Atameken» UKP qyzmetkerleri qatysty.
Ótken aptamen salystarǵanda, vırýs juqtyrý jaǵdaılary 2,9 ese artqan, naýqastardyń 80%-na jýyǵy – indetke qarsy ekpe almaǵandar jáne sońǵy ekpeden keıin 6 aı ótip ketken adamdar. Eldegi COVID-19 kórsetkishteriniń artýyn eskere otyryp, QR aýmaǵynda koronavırýs ınfeksıasynyń taralýyna jol bermeý jónindegi vedomstvoaralyq komısıa óńirler epıdemıologıalyq qaýip-qaterdiń sary aımaǵyna kóshken jaǵdaıda tómendegi qosymsha sharalardy qabyldaý kerektigi týraly sheshim qabyldady: naýqaspen tyǵyz qarym-qatynasta bolǵandardy qashyqtan jumys isteý formatyna kóshirý; COVID-19-ǵa qarsy ekpe saldyrýǵa bolmaıtyn qyzmetkerler men júkti áıelderdi qashyqtan jumys isteý formatyna aýystyrý; jabyq jerler men qoǵamdyq kólikte mindetti túrde maska taǵý; 10-nan astam adam qatysatyn jınalystardy onlaın formatta ótkizýdi usyný.
Sondaı-aq aımaqtyń epıdemıologıalyq ahýalyna qaramastan, áýede, TJ kólikteri men halyqaralyq avtobýstarda maska taǵý usynylady. Otyrys sońynda E. Toǵjanov oblys ákimderine koronavırýs ınfeksıasyna qarsy egý naýqanyn kúsheıtýdi, syrqattanǵandar kóbeıgen jaǵdaıda kadrlarmen, dári-dármek qory jáne tósek oryndarymen qamtamasyz etýdi erekshe baqylaýǵa alýdy tapsyrdy. Sondaı-aq halyq arasynda sapaly túsindirý jumystaryn kúsheıtý qajettigin eskertti.