Almatyda Dostyq úıi ǵımaratynyń májilis zalynda Qazaqstan Respýblıkasynyń Respýblıka kúnin merekeleý sheńberinde «Elimniń erkindigi – meniń maqtanyshym» taqyrybynda konferensıa ótti.
İs-sharaǵa belgili memleket jáne qoǵam qaıratkerleri, tarıhshylar, sarapshylar, úkimettik emes uıymdardyń ókilderi jáne qala jastary qatysty, dep habarlaıdy aqshamnews.kz.
İs-sharanyń basty maqsaty – otansúıgishtik sezimin tárbıeleý, ulttyq sanany nyǵaıtý, eldiń saıası, ekonomıkalyq, áleýmettik jáne mádenı salalardaǵy jetistikterin talqylaý.
Respýblıka kúni merekesi Qazaqstan tarıhyndaǵy mańyzdy sát — 1990 jyly memlekettik egemendik týraly deklarasıanyń qabyldanýyn, odan keıin bul 1991 jyly tolyq táýelsizdikke qol jetkizýdiń alǵashqy qadamdardyń biri.
«Qazaq eli egemendikke ońaı jetken joqpyz. Osy jolda talaı taǵdyrly kezeńder bar. Egemendikti ustap turýda ońaı sharýa emes. Sondyqtan ár adam el damýy úshin óz úlesin tıgizse, el órkendeıdi. Derbestigimiz máńgi bolsyn», – dedi Qazaqstan Jazýshylar Odaǵynyń múshesi, kórnekti qalamger Smaǵul ELÝBAI.
Jıynda sonymen qatar is-sharanyń túpki máni men maǵynasy haqynda ilkimdi oı-pikirler aıtyldy.
«Biz óz táýelsizdigimizdi qorǵaýǵa, tuǵyryn bıik etip ustap turýǵa tıispiz. Jastardyń patrıottyq sezimi arta bersin. Áskerimiz qýatty, rýhymyz bıik bolsyn, halqymyz beıbit kún keshe bergeı», – dedi general-leıtenant Beksultan SÁRSEKOV.