Jarys 24 maýsym kúni bastalady.
Dzúdodan Qazaqstan quramasy Mońǵolıa astanasy Ulan-Batorda ótetin reıtıńtik Grand Slam jarysyna qatysady, dep habarlaıdy Almaty-akshamy.kz Olympic.kz silteme jasap.
Atalǵan álemdik báseke 24 maýsym kúni bastalady. Erler ulttyq quramasynan 13, al áıelder komandasynan 7 sportshy Qazaqstan namysyn qorǵaıtyn bolady.
Erler: Baýyrjan Narbaev (60 keli), Qanat Seıilhan (60 keli), Eldos Smetov (66 keli), Ǵusman Qyrǵyzbaev (66 keli), Erlan Serikjanov (73 keli), Ańsarbek Ǵaınýllın (73 keli), Bekádil Shaımerdenov (81 keli), Abylaıhan Jubanazar (81 keli), Ersultan Muzapparov (90 keli), Dıdar Hamza (90 keli), Nurlyhan Sherhan (-100 keli), Islam Bozbaev (-100 keli), Ádil Orazbaev (+100 keli).
Áıelder: Abıba Abýjaqynova (48 keli), Samalaı Erǵalıeva (63 keli), Zere Bektasqyzy (70 keli), Ekaterına Tokareva (70 keli), Arýna Jangeldına (-78 keli), Nazgúl Maratova (+78 keli), Kamıla Berliqash (+78 keli).
Aıta keterligi, atalǵan jarys Halyqaralyq dzúdo federasıasynyń kúntizbesinde 2024 jyly Parıjde ótetin Jazǵy Olımpıada oıyndaryna upaı úlestiriletin alǵashqy reıtıńtik jarys bolyp tabylady.