Mereıtoıǵa oraı saltanatty jıyn ótti.
Soltústik Qazaqstan oblysynyń qurmetti azamaty, maıdanger, ólketanýshy ári jazýshy Sergeı Presnákov 100 jasqa keldi, dep habarlaıdy Almaty-akshamy.kz QazAqparatqa silteme jasap.
Petropavlda Ekinshi dúnıejúzilik soǵystyń ardageri Sergeı Presnákovtyń mereıtoıyna oraı saltanatty jıyn ótti. Maıdangerge qurmet kórsetý kezinde SQO ákimi Qumar Aqsaqalov el Prezıdentiniń alǵys hatyn oqyp, tósbelgini tabys etti.
«Sergeı Mıhaılovıchtiń esimi Soltústik Qazaqstan oblysynyń tarıhyna altyn áriptermen jazylǵan. Sergeı Presnákov – bizdiń el tarıhyndaǵy kóptegen oqıǵalardyń kýágeri jáne qatysýshysy. Ol Máskeý túbindegi shaıqastarda soǵysyp, 38 atqyshtar brıgadasynda qyzmet etti. Soǵystan keıin partıa organdarynda jumys istedi, ardagerler uıymyn basqardy.Ómiriniń kóp bóligin bizdiń aımaqtyń tarıhyn zertteýge arnady. Soltústik Qazaqstandaǵy ólketaný isiniń damýyna baǵa jetpes úles qosty. Stýdentterge ólketaný jáne týǵan ólke tarıhy kýrstarynan sabaq berdi. Onyń avtorlyǵymen jazylǵan kitaptar arqyly oqyrman el tarıhynan habardar bolady», - dedi óńir basshysy.
Sergeı Presnákov kóptegen orden-medaldardyń ıegeri, «Qurmet belgisi» ordenin 4 ret alǵan. Reseıdiń Samara oblysynyń týmasy SQO-ǵa shamamen 90 jyl buryn kelgen eken. Eńbek jolyn 1939 jyly Omby temirjoly Petropavl stansasynda ekonomıs bolyp bastaıdy. Kóp uzamaı soǵys bastalyp, 19 jasynda Sergeı Presnákov maıdanǵa attanady. Batys, soltústik-batys maıdandary men Máskeý túbindegi shaıqastarǵa qatysady.
Soǵystan keıin ártúrli salada jumys istedi. Zeınet demalysyna shyqqasyn da qyzmetten qol úzbeı, Petropavl joǵary oqý ornynda týǵan ólke men Qazaqstan tarıhynan sabaq beredi. Ólke tarıhyn zertteýden de qol úzbeıdi. Sergeı Presnákov 10-nan astam kitaptyń avtory. Sonyń ishinde 300-den astam maqala kirgen «Soltústik Qazaqstan oblysy» ensıklopedıasy da bar.
1980 jyldary Sergeı Presnákov SQO ardagerler keńesiniń tóraǵasy bolǵan tusta onyń bastamasymen Petropavlda Jeńis saıabaǵy paıda boldy.
