Reseıdiń Astrahan qalasynda qazaqtyń qos ishekti dombyrasyna qyzyǵýshylyq tanytatyndar kóbeıgen.
Tipti nıet bildirýshilerge arnalyp, sol óńirdegi óner jáne mádenıet kolejinde arnaıy oqý synyby da ashylǵan. Ári qandastar kóp shoǵyrlanǵan óńirdegi irgeli bilim ordasynda qazaq mádenıeti men salt-dástúrin nasıhattaıtyn ortalyq jasaqtalyp, óz jumysyn bastady, dep habarlaıdy Almaty-akshamy.kz Qazaqstan.tv saıtyna silteme jasap.
Qazaqtyń degdar dástúri men biregeı salt-dástúrin keńinen nasıhattaıtyn qoǵamdyq ortalyq 31 jyl buryn Astrahanda ashyldy. Bul osynda turatyn 150 myńnan astam qandasqa aınymas baǵdar boldy. Bastama keńinen qanat jaıyp, búginde jańa deńgeıge kóterilgen. Endi ulttyq qundylyqtan shet qalǵan jastar úshin tehnıkalyq ýnıversıtet janynan aýdıtorıa iske qosyldy.
"Osy fakúltatıvke jastarmen qatar, óziniń tilin, dástúrin bilgisi keletin úlken adamdar, balalar keledi. Sonyń ishinde sheteldiń basqa ult ókilderi de oqıdy", - qazaq tili muǵalimi Álıa Ǵumarova.
Astrahandaǵy 15 mektepte qazaq tili fakúltatıvtik pán retinde oqytylady. Saýat ashý kitaptary ábden tozǵan. Sol úshin bastaýysh synyp balalaryna arnalǵan jańa oqýlyq ázirlendi. Oqýlyqtar zamanǵa saı ádisterge negizdelgen ári olardy daıyndaý úshin bilikti mamandar jumyldyrylǵan.
«Naǵyz qazaq – dombyra» degen ustanymdy mundaǵy qandastar jaqsy túsinedi. Qyzyǵýshylyq tanytqan jastar óner kolejinde ulttyq aspapty kásibı deńgeıde meńgerýge kóshken. «Shalqyma» dep atalatyn orkestr quryp, dombyranyń ǵajaıyp múmkindikterin pash etip júr. Talaı baıqaýda jeńimpaz atanyp, talǵampaz kórermenniń kózaıymyna aınalǵan.
"Biz tek qana qazaqtyń mýzykasyn emes, sheteldiń de mýzyksyn oınaımyz. Sosyn qazaqtyń fólkloryn da kóterip jatyrmyz. Suranys kóp, oblystyń 15 aýdanynda árbir qazaq mektebinde dombyra klasy bar", - dedi «Shalqyma» orkestriniń múshesi Qaırat Qazanbaev.
Dombyra úırenemin deýshiler kóp bolǵasyn, kolej janynan arnaıy úıirme de ashylypty. Oǵan 6 jastan asqan balalar qabyldanady.