Qazaqstandyq Danııl Felker Tájikstan astanasy Dýshanbede 18 jasqa deıingiler arasynda ótken tórtinshi sanattaǵy ITF týrnıriniń absolútti chempıony atandy, dep habarlaıdy Almaty-akshamy.kz Inform.kz-ke silteme jasap.
Qazaqstan tenıs federasıasy málim etkenindeı, almatylyq, 17 jastaǵy D.Felker jekeleı synda fınalda 14-tegi taǵy bir qazaqstandyq Ámir Omarhanovpen kezdesti. Tartysty ótken básekede Danııl Qaraǵandy qalasynyń túlegin 6:2, 0:6, 6:2 esebimen utty.
D.Felker juptyq synda almatylyq Oleg Gýsakovpen birge sońǵy machta aqtóbelik Artýr Haırýtdınov – qyzylordalyq Erasyl Erdildany 6:4, 2:6, 10:8 esebimen jeńdi.
Sondaı-aq Aqtóbe qalasynda Azıa tenıs federasıasy aıasynda 14 jasqa deıingiler arasynda ekinshi sanattaǵy jarys aıaqtaldy.
Qyzdar arasynda sońǵy synda qaraǵandylyq Adelına Mamanfınany súrindirgen elordalyq Albına Kákenova altyn medalǵa ıe boldy. Úshinshi orynǵa taǵy bir elordalyq Ádıa Omarbek kóterildi.
Juptyq synda aqtóbelikter Eva Korysheva men Arýjan Dandaeva úzdik shyqty. Olar fınalda elordalyq Tatána Ivanova – shymkenttik Sabına Shýhratovadan basym tústi – 6:4, 6:4. Qaraǵandylyq A.Mamanfına men elordalyq Á.Omarbek qola júldeni qanaǵat tutty.
Uldar arasynda barlyq júldeli oryn astanalyq tenısshilerdiń enshisinde ketti. Mansur Qaırollany 6:1, 6:1 esebimen qapy qaldyrǵan Iaroslav Pshenıchnyı chempıondyq tuǵyrǵa kóterilse, Oljas Esenaly úzdik úshtikke ilikti.
Juptyq synda M.Qaırolla – O.Esenaly jeńimpaz atansa, shymkenttik Shyńǵys Turlybek pen kókshetaýlyq Taıyr Qaıretdınovke ekinshi, aqtóbelik Mansur Saıynov pen qaraǵandylyq Ramazan Shaǵataevqa úshinshi oryn buıyrdy.