Elordadaǵy «QAZAQSTAN» jeńil atletıka sport kesheninde Týrızm jáne sport mınıstrligi Sport jáne dene shynyqtyrý isteri komıtetiniń tóraǵasy Erbol Myrzabosynovtyń tóraǵalyǵymen Ulttyq sport túrlerin damytý jáne 2024 jylǵa arnalǵan mindetter boıynsha alqaly jıyn ótti.
İs-shara barysynda kelesi jyly Astanada uıymdastyrylatyn 5-shi dúnejúzilik kóshpendiler oıyndarynyń daıyndyq barysy sóz boldy, dep habarlaıdy almaty-akshamy.kz. Tól sportymyzdy dáripteýge arnalǵan basqosýǵa Ulttyq jáne at sporty ortalyǵynyń dırektory Baqdáýlet Sábıtov, Ulttyq sport qaýymdastyǵynyń ókilderi, ulttyq sport federasıalarynyń prezıdentteri, óńirlik sport basqarmalarynyń basshylary, aımaqtardaǵy ulttyq sport mektepteri men klýbtarynyń basshylary jáne «Qazsportınvest» AQ mamandary qatysty. Jıynda sóz alǵan Erbol Myrzabosynov ulttyq sport – ulttyq qundylyǵymyzdyń, ulttyq mádenıetimizdiń bir bóligi ekenin aıta kelip, ulttyq sport túrlerin odan ári damytý jáne halyqaralyq arenaǵa shyǵarý basty mindet ekenin jetkizdi.
«Ulttyq sport túrlerinen akkredıttelgen sport federasıalarymen birlese osy baǵytta birqatar is-sharalar atqarylýda. Bıyl ulttyq sporttyń birneshe túrinen álem jáne Azıa chempıonattary, Álem jáne Azıa kýbogi, Dúnıejúzilik jaýyngerlik óner oıyndary syndy iri jarystar ótkizildi. Sportshylardyń nátıjesi jaman emes. Biraq alda turǵan mindetter kóp. Búgingi tańda sonyń eń bastysy – 2024 jylǵy V Dúnıejúzilik kóshpendiler oıyndaryn abyroımen ótkizý. Úzdik nátıjege qol jetkizý úshin myqty daıyndyq qajet. Barshańyzdy aldaǵy Kóshpendiler oıyndaryn joǵary deńgeıde ótkizýge atsalysýǵa shaqyramyn», - dedi Erbol Myrzabosynov.
Kún tártibinde turǵan Ulttyq sport túrlerinen respýblıkalyq federasıalardyń atqarǵan jumystary men alǵa qoıǵan josparlary, Respýblıka boıynsha ulttyq sporttyń damýy, 5-shi Dúnıejúzilik kóshpendiler oıyndaryna daıyndyq barysy, Ulttyq sport túrlerin damytý jáne ár túrli máseleler boıynsha federasıa basshylary, ulttyq jáne at sporty ortalyǵynyń dırektory, «Qazsportınvest» AQ prezıdentiniń orynbasarlary baıandama jasady. Árbir federasıa atqarǵan jumystaryna esep berip, Ulttyq sporttyń áleýetin arttyrý maqsatynda usynystar aıtty. Jıyn sońynda ulttyq sport túrleriniń ózekti máseleleri talqylanyp, oń sheshim tabý úshin barlyq federasıa birlese jumys atqarýǵa ýaǵdalasty.