Astanada QR Oqý-aǵartý mınıstrligine qarasty «Talap» KEAQ uıymdastyrǵan WorldSkills Kazakhstan – 2023 VIII Respýblıkalyq chempıonaty óz máresine jetti.
Úsh kún boıy óńirlik chempıonattardyń jeńimpazdary 30 quzyret jáne 7 baǵyt boıynsha úzdik ataný úshin baq synasty. Saltanatty marapattaý rásimine Oqý-aǵartý mınıstri Ǵanı Beısembaev qatysty, dep habaraıdy Almaty-akshamy.kz.
Mınıstr óz sózinde barlyq qatysýshylardy tehnıkalyq jáne kásiptik bilim berý salasyndaǵy aıtýly sharamen quttyqtap, el ekonomıkasyn damytýdaǵy jumysshy mamandyqtarynyń róline erekshe toqtaldy.
«WorldSkills Kazakhstan – bul jumysshy mamandyqtaryn meńgergen stýdentter úshin úlken múmkindikterge jol ashatyn aýqymdy chempıonat. Osyndaı sharanyń arqasynda elimizdegi jetekshi kompanıalarmen yntymaqtastyq ornata alasyzdar. Álemdik reıtıńtegi pozısıa da aıtarlyqtaı nyǵaıyp keledi. Bıyl bizdiń stýdentter EuroSkills Gdansk týrnıriniń tarıhyndaǵy eń jaqsy nátıjege qol jetkizip, eki medal men tórt «Úzdik medalón» jeńip aldy. Jumysshy mamandyqtarynyń ókilderi - elimizdiń kúsh-qýaty. Sondyqtan da Memleket basshysynyń qoldaýymen jyl saıyn tehnıkalyq mamandyqtarǵa memlekettik tapsyrys ulǵaıyp, kolej stýdentterine jan-jaqty áleýmettik qoldaý kórsetilip keledi», – dep atap ótti Ǵanı Beısembaev.
Baıqaý jeńimpazdaryn QR Parlamenti Májilisiniń depýtaty Irına Smırnova marapattady. WorldSkills Kazakhstan-2023 VIII respýblıkalyq chempıonatynda barlyǵy 100 medal: 38 altyn, 26 kúmis jáne 36 qola utysqa salyndy. 153 qatysýshy «Úzdik medalónyn» jeńip aldy.
Komandalyq esepte 30 quzyret boıynsha 6 altyn, 2 kúmis, 3 qola medal jeńip alǵan Abaı oblysynyń komandasy kósh bastady. Ekinshi oryndy Almaty qalasynyń komandasy ıemdenip, 4 altyn, 1 kúmis jáne 4 qola medal jeńip aldy. Úshinshi oryn alǵan Shymkent qalasynyń quramasy 29 quzyret boıynsha 5 altyn, 2 qola medaldi qanjyǵasyna baılady.
Budan basqa, kásibı sheberlik chempıonatynyń jeńimpazdary elimizdiń jetekshi kompanıalarynan: «Grohe», «Knauf», «1S Kazahstan», «Robert Bossh», «Welding Company», «ESAB» jáne t.b. jumysqa shaqyrtýlar aldy. Konkýrstyń barlyq 545 qatysýshysy WeDoEducation-nen tańdaǵan túrli salalardaǵy kez-kelgen mamandyq boıynsha bilim alý úshin granttarǵa ıe boldy.
Eske salaıyq, «WorldSkills Kazakhstan 2023» VIII respýblıkalyq chempıonaty 2023 jyldyń 23-25 qarashasy aralyǵynda ótti. Oǵan elimizdiń túkpir-túkpirinen 545 stýdent pen 510 sarapshy qatysty. Saıys qatysýshylary 30 quzyret boıynsha óz jumystaryn tanystyrdy. Olardyń ishinde kirpish qalaý, qurylys jáne sylaq, santehnıka jáne jylý júıesi, grafıkalyq dızaın, dánekerleý tehnologıasy, kondıter, shashtaraz isi, meıramhana servısi jáne t.b. boldy. Jeńimpazdar 2024 jyldyń 10-15 qyrkúıegi aralyǵynda Fransıanyń Lıon qalasynda ótetin WorldSkills halyqaralyq chempıonatyna barady.