Sý resýrstary jáne ırrıgasıa mınıstri Nurjan Nurjigitov Eýropa men Ortalyq Azıadaǵy sý resýrstaryn basqarýdyń jahandyq praktıkasy jetekshisi Ýınston Iý bastaǵan Dúnıejúzilik bank ókilderimen kezdesti.
Eske sala keteıik, osyǵan deıin Memleket basshysy elimizge ınvestorlardy tartý boıynsha belsendi jumys júrgizýdi tapsyrǵan bolatyn.
Dúnıejúzilik bank ókilderi Aral teńizin qalpyna keltirýdiń Qazaqstan úshin ǵana emes, búkil Ortalyq Azıa úshin de mańyzy joǵary ekenin jáne jobanyń birinshi kezeńi sátti júzege asqanyn atap ótti. Aıtýynsha, álemdik qaýymdastyq teńizdiń taǵdyryna alańdaýshylyq tanytýda, dep habarlaıdy aqshamnews.kz Sý resýrstary jáne ırrıgasıa mınıstrligine silteme jasap.
Sondaı-aq, Dúnıejúzilik bank ókilderi Qazaqstanǵa óńirlik baǵdarlamany ázirleýge qatysýdy usyndy, onyń sheńberinde Ortalyq Azıanyń barlyq memleketterinde uqsas jobalar iske asyrylatyn bolady. Mundaı joba aıasynda ırrıgasıa jáne drenaj júıelerin jańǵyrtý boıynsha birlesken jumysty jalǵastyrýǵa bolatynyn atap ótti.
Nurjan Nurjigitov óz kezeginde Dúnıejúzilik bank ókilderine transshekaralyq ózenderdegi sý resýrstaryn esepke alý men monıtorıń jumysyn avtomattandyrý boıynsha jumysqa qosylýdy usyndy.
«Biz Dúnıejúzilik bankpen jáne basqa da halyqaralyq qarjy ınstıtýttarymen uzaq jáne tabysty jumys istep kelemiz. Aral teńizin saqtaý sekildi shyn máninde aýqymdy jobalardy iske asyrýǵa sheteldik áriptesterimizdi belsendi tartamyz, sondaı-aq kórshi eldermen de ózara is-qımyl jasaımyz. Dúnıejúzilik bankpen jobanyń ekinshi kezeńindegi birlesken jumysymyz alǵashqy kezeń nátıjesine saı tabysty bolady dep senemin»,- dedi Sý resýrstary jáne ırrıgasıa mınıstri Nurjan Nurjigitov.