Qazaqstan Respýblıkasynyń Ázerbaıjandaǵy Elshisi Álim Baıel Ázerbaıjannyń Densaýlyq saqtaý mınıstri Teımýr Mýsaevpen kezdesti.
Qazaqstandyq dıplomat ekijaqty qarym-qatynastardyń joǵary deńgeıi men dınamıkasyn atap ótti. Elshi emdik týrızm maqsatynda Ázerbaıjanǵa keletin qazaqstandyqtar sanynyń jyl saıyn artyp kele jatqanyna, óz kezeginde Ázerbaıjan azamattarynyń Qazaqstannyń medısınalyq oqý oryndarynda tabysty bilim alyp jatqanyna nazar aýdardy, dep habarlaıdy aqshamnews.kz.
Ázerbaıjandyq mınıstr eki el arasynda densaýlyq saqtaý salasyndaǵy qatynastardy damytý úshin úlken áleýettiń bar ekendigin atap ótti. T. Mýsaev elderimiz dári-dármekterdi óndirý boıynsha birlesip jumys isteı alar edi degen pikirin aıtty. Sonymen qatar, Mınıstr medısınalyq mekemelerdi akredıtasıalaý jáne sapasyn baqylaý salasyndaǵy qazaqstandyq tabysty tájirıbeni zerdeleýge jáne Ázerbaıjanda engizýge qyzyǵýshylyq bildirdi.
Elshi Á. Baıel qazaqstandyq kompanıalardyń Ázerbaıjanda, onyń ishinde Qarabaqta medısınalyq nysandardyń qurylysyna atsalysýǵa daıyn ekenin málimdedi. Mınıstr T. Musaev bul bastamany oń qabyldap, osy baǵytta yntymaqtastyq jasaýǵa daıyn ekendikterin jetkizdi.
Kezdesý barysynda T. Musaev Ázerbaıjannyń Qazaqstan Prezıdenti Qasym-Jomart Toqaev usynǵan alǵashqy medısınalyq-sanıtarlyq kómek jónindegi elder koalısıasyn qurý týraly bastamany qoldaıtynyn atap ótti. Medısına salasyn halyqarylyq deńgeıde damytýǵa baǵyttalǵan bul bastamany Memleket basshysy 2023 jylǵy 23 qazanda ótken Almaty deklarasıasynyń 45 jyldyǵyna jáne Astana deklarasıasynyń 5 jyldyǵyna arnalǵan jahandyq konferensıa barysynda usynǵan bolatyn.