Arab Ámirlikterinde Qazaqstan sýretshisi, dızaıner Láılá Jarqyn shyǵarmalarynyń kórmesi ótti.
Elimizdiń Dýbaıdaǵy Konsýldyǵynyń qoldaýymen uıymdastyrylǵan mádenı is-sharaǵa osy memlekette júrgen otandastarymyz, qala turǵyndary men qonaqtary jınaldy. Kelýshiler kıizden jasalǵan buıymdardy tamashalap, qazaq óneriniń qudiretine taǵy bir márte tańǵalysty, dep habarlaıdy almaty-akshamy.kz.
«Týǵan jer» ataýymen ótken kórmede kásibı sýretshi Láılá Jarqyn onǵa jýyq kıiz tekemet pen qolóner buıymdaryn tanystyrdy. 18 jasynan beri kıiz basý ónerin tańdaǵan sýretshi umytylyp bara jatqan ulttyq qolónerdi dáriptep, ony jańǵyrtýǵa bel býǵan.
Láılá Jarqyn, Qazaqstan sýretshiler odaǵynyń múshesi: - Bizdiń ónerdi tanytý, tek qana qazaqstandyqtarǵa ǵana emes, álemge tanytý. Qazirgi ósip kele jatqan urpaqtyń osy ónerge jaqyndaǵanyn qalaımyn jáne osyndaı bizdiń bar baılyǵymyzben álemmen bóliskim keledi.
Kórmeni tamashalaýǵa kelgenderdi sheber shyǵarmalarynyń mazmuny ǵana emes, kıizdi daıyndaý tehnıkasynyń ereksheligi de qyzyqtyrdy. Tabıǵı taza materıaldan jasalǵan syrmaq, tekemet, túskıiz, taqıa sekildi ónimder úlken suranysqa ıe. Kıiz búginde sýretshiler, dızaınerler, qolóner sheberleriniń oı-qıalyndaǵy sulýlyqty jetkizetin basty quralynyń birine aınalǵan.
Ádemi tústerge boıalyp, shúıkelenip qoıǵan jabaǵy júndi osylaı ıkemdep, qalaǵan dúnıeni jasap alýǵa bolady. Sheberdiń aıtýynsha kıiz basý ótken zamandaǵydaı tym kúrdeli emes. Kerisinshe, kez kelgen adam tez úırenip alatyn kásip.
Dınara Shahmetova, "Nomad" mádenı ortalyǵynyń jetekshisi: - Bizdiń mádenı qundylyqtarymyzdy jańǵyrtý. Shetelde júrgennen keıin salt-dástúrimizdi umytpaý úshin biz osyndaı sharalardy uıymdastyryp jatyrmyz. Dýbaıda turatyn qytaılyq qandasymyz Raýshangúl Ázız sheber uıymdastyrǵan qolóner sabaǵyna qyzyn erte kelgen. Anasynan úırengenin urpaǵy da jalǵastyrǵanyn qalaıdy.
Raýshangúl Ázız, turǵyn: - Kishkene kezimizde basatynbyz jaılaýda. Ákem men aǵalarym kıizdi ılep qolymenen, ystyq sýdan bilekteri qyp-qyzyl bolyp shyǵatyn. Balalyq shaǵyma ketip qalǵandaı bolyp, sheshemniń, ájemniń janynda júrgendeı kúı keship turmyn.
Maqtanyp aıta almaımyn ájemmen birge istedim dep, qazir rahattanyp istep otyrmyn, keremet eken, shabyt ta keledi, denem titirkenip keremet sezimdemin.
Qysqa ýaqyttyń ishinde kıizden kóz tartar kórkem dúnıeler jasaldy. Qólóner sheberi Láılá Jarqynnyń dittegen maqsaty da osy – kıiz basýdyń jeńil ádisin úıretý arqyly ata-babamyzdan kele jatqan asyl murany máńgige saqtap qalý.