Akýsherlik-gınekologıalyq kómektiń sapasyn arttyrý jónindegi odan ári sharalar Densaýlyq saqtaý mınıstri Aqmaral Álnazarovanyń tóraǵalyǵymen bosandyrý qyzmetiniń jumysyn jetildirý jónindegi úılestirý keńesiniń otyrysynda qaraldy.
DDU baǵalaýy boıynsha, Qazaqstan osy kórsetkishti jaqsartý dınamıkasy joǵary 10 eldiń qataryna kirdi. Halyqaralyq uıymnyń esebinde respýblıkadaǵy ana ólimi sońǵy 20 jylda 76%-ǵa tómendegeni atap ótildi, bul júktilik, bosaný jáne bosanǵannan keıingi kezeńde áıelderge arnalǵan medısınalyq kómektiń sapasyn jaqsartý boıynsha tıimdi júıeli sharalardy iske asyrý esebinen qol jetkizildi.
Otyrys barysynda QR DSM bas akýsher-gınekology, QR DSM bas shtattan tys ınfeksıonısti, «Astana medısına ýnıversıteti» KeAQ, M.Ospanov atyndaǵy BQMÝ, «Semeı medısına ýnıversıteti»KeAQ, «S. Asfendıarov atyndaǵy QazUMÝ» KeAQ Akýsherlik jáne gınekologıa kafedralary meńgerýshileriniń, sarapshy-dárigerlerdiń qatysýymen qyzmettiń jumysyn jaqsartýdyń ózekti máselelerin talqylady.
Bul densaýlyq saqtaýdyń alǵashqy býynynyń bosandyrý uıymdarymen tyǵyz qarym-qatynasy, medısına qyzmetkerlerin aýdandyq aýrýhanalar deńgeıinde eń jaqsy akýsherlik praktıkaǵa úıretý, prenataldyq baqylaýdyń sapasyn arttyrý jáne bolashaq analardy pregravıdalyq daıyndyqpen qamtý (júktilikti josparlaý).
«2024 jyly Qazaqstanda alǵash ret ana óliminiń eń tómen kórsetkishi tirkeldi, bul Densaýlyq saqtaý mınıstrliginiń tarapynan qabyldanǵan júıeli keshendi sharalardyń, sondaı-aq alǵashqy býyn deńgeıinde sarapshylardyń, akýsher-gınekologtardyń, bosandyrý qyzmeti mamandarynyń kópbeıindi komandasynyń birlesken jumysynyń nátıjesi boldy. 2023 jylmen salystyrǵanda ana ólimi jaǵdaılarynyń 12%-ǵa tómendeýine qol jetkizildi, bul 100 myń tiri týǵanǵa shaqqanda 10,1-di qurady», - dep atap ótti óz sózinde Ana men bala densaýlyǵyn saqtaý departamentiniń dırektory Maǵrıpa Embergenova.
Sońǵy jyldary qabyldanǵan sharalar, sonyń ishinde akýsherlik kómekti uıymdastyrý standarttaryn ózektendirý, júkti jáne bosanǵan áıelderdiń marshrýttaryn ońtaılandyrý, sondaı-aq bosaný prosesine qatysýshylardyń barlyǵyn úılestirýdi kúsheıtý ortalyqta da, óńirlerde de analardan aıyrylýdy aıtarlyqtaı tómendetý túrinde óz nátıjelerin berdi, dep atap ótti Úılestirý keńesiniń qatysýshylary.
2024 jyldyń qorytyndysy boıynsha bosandyrý salasynda 706 synı jaǵdaı tirkeldi, onyń 95%-y qabyldanǵan júıeli sharalardyń nátıjesinde áıelder diń ómirý saqtalyp qaldy. 1000 bosanýǵa shaqqandaǵy eldegi synı jaǵdaıdyń kórsetkishi 1,9, ótken jyly ol 2,2-dy qurady. 2021 jyldan bastap synı jaǵdaılardyń 40%-ǵa tómendeýi baıqalady, alaıda júktilik kezinde alǵash ret dıagnoz qoıylǵan aýyr somatıkalyq patologıalary bar júkti áıelderdiń ósýi baıqalady.
Júkti áıelderge medısınalyq kómek kórsetýdegi jaǵdaıdy jaqsartý maqsatynda Densaýlyq saqtaý mınıstrligi apta saıyn óńirlermen «Akýsherlik saǵat» ótkizedi, aýyr patologıasy bar áıelderge kún saıyn monıtorıń júrgizedi.
Ótken jyly Ulttyq shuǵyl medısına ortalyǵymen birlesip 906 júkti jáne bosanǵan áıelge 2140 qashyqtyqtan medısınalyq qyzmet kórsetildi; sanıtarıalyq avıasıamen 165 ushý oryndaldy; jergilikti jerde 9 áıelge operasıa jasaldy; oblystyq jáne respýblıkalyq klınıkalarǵa tasymaldanǵan aýyr jaǵdaıdaǵy 127 áıeldiń ómirin saqtap qaldy.
Bosaný salasynda anestezıologıa-reanımatologıa, kardıologıa, hırýrgıa, neırohırýrgıa, ınfeksıa, pýlmonologıa, tamyr hırýrgıasy, gematologıa, ýrologıa, gastroenterologıa jáne t. b. salalarda 40-tan astam jetekshi mamandy, profesordy jáne ǵylymı jáne respýblıkalyq klınıkalardyń qyzmetkerin tarta otyryp, telemedısınalyq konsýltasıalar praktıkasy keńinen engizilýde.
«Jalpy praktıka dárigerleriniń júktilik densaýlyǵy úshin emhana deńgeıindegi jaýapkershiligin kúsheıtý qajet, olardyń daǵdylary men bilimderin keńeıtý maqsatynda bilim berý baǵdarlamalaryn qaıta qaraý, jergilikti jerlerde kadrlardy tartý, olardyń biliktiligin arttyrý úshin yntalandyrý jasaý, sondaı-aq eń qıyn ýchaskelerde - bizdiń perzenthanalarymyz ben perınataldyq ortalyqtarymyzda jumys isteıtin mamandardyń mártebesin kóterý. Júkti áıelderge medısınalyq kómek kórsetýde, eń aldymen olardyń qaýipsizdigin qamtamasyz etýde, jergilikti jerlerde reanımasıa jáne anestezıologıa máselelerin sheshýde naqty basymdyq berý kerek», - dep atap ótti A.Álnazarova.