Qazaqstanǵa tumaýǵa qarsy 2 mıllıon 280 myńnan astam doza vaksına ákelingen.
Qazaqstanda Densaýlyq saqtaý mınıstrliginiń málimeti boıynsha, 2,1 mıllıonnan astam adam jiti respıratorlyq vırýstyq ınfeksıa (JRVI) men tumaýmen aýyrǵany tirkeldi, dep habarlaıdy Almaty-akshamy.kz
Densaýlyq saqtaý mınıstriniń orynbasary Vácheslav Dýdnık Qazaqstanda jiti respıratorlyq vırýstyq ınfeksıalar men tumaýmen syrqattanýshylyqtyń maýsymdyq kúrt ósýi baıqalyp otyrǵanyn, bul ótken jyldyń sáıkes kezeńimen salystyrǵanda aıtarlyqtaı joǵary ekenin aıtty. Mundaı jaǵdaı epıdemıa bolyp sanalady.
«Epıdemıa bastalǵannan beri, ıaǵnı 1 qazannan beri sanıtarlyq qyzmettiń málimetinshe, 2 mıllıon 100 myńnan astam jiti respıratorlyq vırýstyq ınfeksıa tirkeldi. Onyń ishinde 14 jasqa deıingi balalar arasynda - 1 mıllıon 370 myń adam bar. Biz qozdyrǵyshqa zertteý júrgizdik. «V» tobynyń vırýsy barlyq oblysta baıqaldy. Al sýyq tıý aýrýynyń ósýi byltyrǵyǵa qaraǵanda orta eseppen 10% joǵary», - dedi Densaýlyq saqtaý mınıstriniń orynbasary Vácheslav Dýdnık.
Sonymen qatar ol profılaktıkalyq maqsatta Qazaqstanǵa tumaýǵa qarsy 2 mıllıon 280 myńnan astam doza vaksına ákelingenin, qazirdiń ózinde 2,5 mıllıon adam nemese el halqynyń 12%-y ekpe alǵanyn aıtty.
21 jeltoqsanda Densaýlyq saqtaý mınıstri Ajar Ǵınıat Qazaqstanda shoshqa tumaýynyń taralyp jatqanyn málimdedi.