Dombyrada kúı oryndap, onysyna "Qazaqstan" dep ataý bergen aýstralıalyq azamattyń vıdeosy jelide jeldeı esti. Ulttyq aspapta sheber oınap, avtorlyq kúı shyǵarǵan sheteldiktiń ónerine kópshilik tánti bolyp, jyly pikirlerin jaýdyryp jatyr. Talaıdy tańdaı qaqtyrǵan jan kim? Aqshamnews.kz tilshisi dombyramen kúı shyǵarǵan Mark Istonmen suhbattasyp, áńgimesin tyńdady.
sýret: keıipkerdiń jeke arhıvinen
Qazaq kúıine ǵashyq bolǵan aýstralıalyq mýzykant
Mark Iston - aýstralıalyq mýzykant. Ónerden bólek kólik jóndeýmen de áýestenedi. Biraq ony kópshilikke tanymal etken qazaqtyń ulttyq aspaby dombyraǵa degen yqylasy boldy.
"Dombyrany alǵash ret osydan tórt jyl buryn İshki Mońǵolıanyń hevı-metal tobynan estidim. Sóıtsem, olar qazaqtyń dombyrasyn qosyp oınaıdy eken. Úni erekshe ádemi. İzdenip kórip edim, onyń ataýy - dombyra ekenin bildim. Sol kezde ULYTAU, HASSAK, TURAN ETHNO GROUP sıaqty qazaq toptarynyń mýzykasyn tyńdap ǵashyq boldym", - deıdi ol.
Alǵashqy áserden keıin ol birden dombyra satyp alýdy oılaǵan.
"Vırtýoz dombyrashylardyń oryndaýyn jeliden kórip, shabyttanyp kettim. Sodan soń dombyrany aldymen óz betimshe úırene bastadym. Keıin jergilikti qazaqtardan jeke sabaq ala bastadym. Biraq kóp sabaq alsam, óz stılimdi joǵaltyp alam ba dep qoryqtym. Sebebi men rok baǵytynda oınaımyn. Sondyqtan óz ereksheligimdi saqtaǵym keldi", - deıdi Mark.
Ǵalamatqa arnalǵan "ǵalamat týyndy"
Mark dombyraǵa óziniń batystyq stılin qosyp, qazaq kúıine jańa baǵyt usynǵan adam. Ol alǵashqy kúıin belgili dombyrashy Ǵalamat Beıseqojanyń oryndaýynan shabyttanyp jazǵan.
"Men Ǵalamat degen jigitti kezdestirdim. Ol keremet kompozıtor ári dombyrashy. Onyń qalaı oınaıtynyn kórip, tańǵaldym. Sol sátte ózim de bir kúı jazyp kórýge bel býdym. Alǵashynda kúıdi Ǵalamattyń atymen ataǵym keldi. Biraq sheteldikter, onyń ishinde ózim de, esimin durys aıta almaı qalarmyz dep, kúıdiń atyn "Qazaqstan" dep qoıdym", - deıdi mýzykant.
Marktyń aıtýynsha, "Qazaqstan" kúıi birneshe fazadan turady.
"Aldymen kúı jaı bastalady. Sosyn dombyra men aýyz syrnaı qosylyp oınaıdy. Keıin yrǵaǵy daladaǵy tulparlardyń shabysyn elestetedi. Al orta tusynda azdap tamaqpen án aıtý tehnıkasyn qostym. Bul - ózimdi ótken shaqqa, Ortalyq Azıa mýzykasynyń túbine oralǵandaı sezim syılaıdy", — deıdi ol.
"Qazaq halqynyń qonaqjaılyǵyn eshteńege teńeı almaımyn"
Mark dombyrany nebári úsh aıda meńgerip, alǵashqy kúıin jazyp shyqqan. Onyń ıkemdiligine buǵan deıin gıtarada erkin oınaýy kóp kómektesken eken.
Osy ýaqytqa deıin mýzykant Qazaqstanǵa eki ret kelgen. Almatyǵa kásibı dombyra alý úshin arnaıy saparmen kelip, "Almaty" atty ekinshi ánine beınebaıan túsirip ketken. Sondaı-aq ol "Láılá-Qobyz" tobymen birge "Búrkitshi qyz" atty týyndy jazyp, Arbat pen Panfılov kóshesinde kóshe konsertterin de ótkizgen.
"Qazaqstanǵa kelip júrgende kóp adammen tanystym. Barlyǵy qol ushyn berýge daıyn boldy. Bul maǵan keremet áser qaldyrdy. Shynymdy aıtsam, Qazaqstandaǵy dostyq pen ashyqtyq deńgeıi meni tańǵaldyrady. Adamdary óte baýyrmal, tamaǵy da dámdi. "Spirit of Tengri" festıvaline qatystym - men kórgen eń tamasha shara! Qazaqstanǵa qaıtadan baryp, taǵy da mýzyka oryndaǵym keledi", — deıdi Mark.
Qazir ol "Qazaqstan" kúıine resmı beınebaıan túsirip jatyr. Onyń aıtýynsha, endigi maqsaty - qazaqtyń ulttyq aspaby arqyly óz tyńdarmandaryna Ortalyq Azıanyń syrly áýenin sezindirý.
"Men qazaq ónerin álemge tanytqym keledi. Meniń kúıimdi Perýden bastap, Qazaqstanǵa deıin tyńdap jatyr. Bul - úlken mártebe", — deıdi aýstralıalyq kúıshi.