Áıgili koróldik klýb "Real Madrıd" Almatyǵa kelip, jelide qala týraly birneshe posttar jarıalady. Olardyń arasynda dombyramen án shyrqaǵan qazaqstandyq bozbalany da baıqaýǵa bolady. 200 mıllıonǵa jýyq oqyrmany bar, álemniń 15 dúrkin úzdik klýby atanǵan "Realdyń" paraqshasynda tóbe kórsetken jigit kim? Aqshamnews.kz tilshisi anyqtady.
"Sáken Seıfýllınniń ánin ıspandyqtarǵa maqtanyshpen oryndap berdim"
Tanymal klýbtyń paraqshasynan kózge túsken jigittiń esimi - Damır Sarman. Ol Qyzylorda oblysy, Jańaqorǵan aýdanynyń týmasy. Qazir Almatyda Abaı atyndaǵy QazUPÝ-de mýzykalyq bilim berý mamandyǵy boıynsha 4-kýrsta bilim alyp jatyr. Kópti shýlatqan jaıt týraly bylaısha áńigmelep berdi.
"Sol kúni dostarmen aralyq baqylaýǵa daıyndalyp júrgenbiz. Saıabaqta kamera asynǵan adamdar kózge tústi. Artynsha bilýimizshe "Real Madrıdtiń" vıdeograftary eken. Dombyra tartyp turǵanymyzǵa toqtap, “aǵylshyn tilinde sóıleı alasyzdar ma?” dep surady. Bilgenimizshe jaýap berip, ótinishteri boıynsha ándi aıtyp berdik. Kadrǵa ener-enbesimiz belgisiz bolsa da, Sáken Seıfýllınniń "Taý ishinde" ánin ıspandyqtarǵa kósile oryndap berdim", - dedi ol.
