Bıyl 3 qazanda saǵat 15:00-de Almaty mýzeıinde Belgrad qalasy mýzeıiniń «Serb áıeli: ǵasyrlar toǵysynda» atty kórmesi ashylady. Qoǵamdaǵy áıel mártebesin aıshyqtap, dáripteıtin kórme Serbıa tarıhy men mádenıetiniń biregeı murasymen de tanystyrady.
Kórmeniń ashylý saltanatyna Serbıanyń Birinshi hanymy Tamara Výchıch pen Qazaqstan Respýblıkasynyń Mádenıet jáne aqparat mınıstri Aıda Balaeva qatysady.
Ekspozısıa Serbıanyń 7500 jylǵa jýyq tarıhyn qamtıdy. Kórme kelýshilerge serb qoǵamyndaǵy áıeldiń orny men róli qalaı ózgergeni týraly tyń tarıhı málimetterdi usyna otyryp, áıgili serb sýretshileri, ǵalymdary, sportshylary men qoǵam qaıratkerleriniń ómiri men jetistikterinen syr shertedi.
Ekspozısıada Belgrad qalasy mýzeıiniń baı qorynan alynǵan qundy jádigerler – ejelgi dáýirden búgingi kúnge deıingi arheologıalyq artefaktiler, etnografıalyq jádigerler, sándik-qoldanbaly óner týyndylary, sondaı-aq XIX ǵasyrdaǵy serb áıelderiniń portretteri usynylady. Kórmeni 2025 jyldyń 15 qarashasyna deıin kelip tamashalaýǵa bolady.
Bul halyqaralyq joba – Almaty men Belgrad arasyndaǵy mýzeıaralyq yntymaqtastyqtyń jalǵasy retinde uıymdastyrylýda. 2024 jyldyń jeltoqsan aıynda Belgrad qalasynda Hanshaıym Lúbısa saraıynda Almaty mýzeıiniń «Uly Dalanyń mádenı murasy» halyqaralyq kórmesi joǵary deńgeıde ótkizilgen edi.