Búgin, 17 tamyzda elimizdegi aıyrbas pýnktilerinde $1 baǵamy – 468 teńgege deıin jetti. Ulttyq valúta baǵamynyń turaqsyzdyǵy týraly qarjyger Rasýl Rysmambetov pikir bildirdi, dep habarlaıdy Almaty-akshamy.kz.
Sarapshynyń aıtýynsha, teńgeniń quldyrap, dollardyń nyǵaıýyna birneshe sebep bar.
«AQSH aqshasynyń qymbattaýyna úsh negizgi sebep bar. Eń bastysy, bul búdjettik túzetý. Óıtkeni, bizde dástúr boıynsha búdjet tamyz aıynda qaralady. Úkimet bizdiń jalaqyny, zeınetaqyny kótergisi keledi. Ekinshi sebep. Bul halyqtyń ózi dollardyń qymbattaýyn kútkeni. Shynynda da, qazir teńge baǵamynyń tómendeýi rúbldiń turaqty valútalarǵa qatysty álsireýimen tuspa-tus keldi. Reseı - bizdiń saýda-satyq salasyndaǵy áriptesimiz. Reseıde dollardyń qymbattaýy kórshi eldegi ınflásıanyń ósýin bildiredi. Álbette, munyń bári bizge sózsiz áser etedi»,- dedi qarjyger.
Budan bólek, elge reseılik taýarlar kirdi degen boljam bar. Kórshi el taýarlary Qazaqstandaǵy rúblge beıimdelýi kerek. Sondyqtan saýda jelileri qaıta qurylady. Oǵan eki aıdaı ýaqyt ketedi.
«Úshinshiden, kúzge qaraı iri kompanıalar qaryzdaryn óteı bastaıdy. (Oblıgasıa tólemderi taǵy basqalary). Sondyqtan olar rúbl kúrt arzandaǵan sátti tıimdi paıdalanbaq. Olar teńge de quldyraıdy degen boljam jasap, dollar satyp alady. Osy 3-4 derek sáıkes kelip tur. Tórtinshi faktor. Úkimet kvazımemlekettik sektordyń ulttyq kompanıalary qor bırjasy arqyly satýy tıis mindetti valútalyq túsimderdiń úlesin azaıtqysy keledi. Osylaısha, Úkimet búdjet qarjysyn arttyrǵysy keledi. Teńge – jumsaq valúta»,- dedi Rasýl Rysmambetov.