Mádenıet jáne sport mınıstri Asqat Oralov dýbláj máselesi boıynsha apparat keńesin ótkizdi.
Kún tártibindegi basty taqyryp – kórermenderdiń suranysyna ıe kasalyq fılmderdi memlekettik tilde dýblájdaý, dep habarlaıdy Almaty-akshamy.kz
"Jyl basynan Qazaqstanda birneshe iri kınopremera ótti. Olardyń keıbiri qazaq tilinde dýblájdyń bolmaýyna baılanysty kórermenderimizdiń nazarynan tys qaldy. Men halyqtyń pikirin baqylap otyrmyn. Biz bul máseleni eshqashan esten shyǵarmaımyz. Kasalyq fılmder aýdıtorıaǵa memlekettik tilde qoljetimdi bolýy kerek", - dedi Oralov apparat keńesinde.
Onyń aıtýynsha, bıyl mádenıet salasyn damytýdyń 7 jyldyq tujyrymdamasy ázirlenip, úkimet qaýlysymen bekitildi. Mınıstrlik endi jyl saıyn kem degende 15 kınopremeraǵa qazaq tilinde dýbláj jasalýy kerek degen mindet qoıyp otyr.
"Taǵy bir ózekti másele – qazaqsha dýblájben shyǵatyn kartınalar seansy árdaıym kórermenderge yńǵaıly ýaqytta qoıyla bermeıdi. Bul týraly da maǵan áleýmettik jelide jıi jazady. Fılmdi memlekettik tilde kórgisi keletinder kóbinese túnde kınoǵa barýǵa májbúr. Bul, árıne, durys emes. Biz kınoteatrlardyń jekemenshik kásip nysany ekenin túsinemiz. Degenmen de memlekettik turǵydan biz dúnıejúzi kóretin kınopremeralardyń qazaq tilinde jáne yńǵaıly ýaqytta kórsetilýin qamtamasyz etýge mindettimiz", - dedi mınıstr.
Osyǵan baılanysty Oralov jeke kásipkerlermen, kınoteatr ıelerimen osy baǵyttaǵy jumysty jandandyrýdy tapsyrdy.
Aıta keteri, mádenıet jáne sport mınıstri naýryz aıynda memlekettik tilge dýbláj jasaý úshin fılmderdi irikteý erejesin bekitti. Mınıstrlik aldaǵy birneshe jylda jalpy prokattaǵy qazaq tilindegi fılmderdiń úlesin 30%-ǵa deıin jetkizýge nıetti. Bul kórsetkish kasalyq sheteldik fılmderge memlekettik tilde dýbláj jasaý arqyly da artýy tıis.