Baǵdarlamanyń qabyldanǵanyna 13 jyl ótse de, aýyldyq jerlerde kadr tapshylyǵy áli de ózektiligin joıǵan joq.
Májilis depýtaty Meırambek Tólepbergen «Dıplommen aýylǵa» baǵdarlamasyna mono jáne shaǵyn qalalardy da engizýdi usyndy, dep habarlaıdy Almaty-akshamy.kz
«Jaqynda óńirlerde saılaýshylar men túrli sanattaǵy áleýmettik toptarmen, jas mamandarmen bolǵan kezdesýlerde Úkimetke aıtylǵan usynystar az bolǵan joq. Ásirese, «Dıplommen aýylǵa» baǵdarlamasynyń tıimdiligin arttyrý jaıynda ózekti másele qozǵaldy. Elimizde 2009 jyldan beri júrgizilip kele jatqan «Dıplommen aýylǵa» baǵdarlamasynyń maqsaty – dıplomdy mamandardy aýyldyq jerde turaqtandyrý», - dedi depýtat.
2009-2020 jyldary osy jobany júzege asyrýǵa 77 myńnan astam maman 11,5 mlrd teńge somasynda kóterme járdemaqy alsa, 36 myńnan astam maman turǵyn úı satyp alý úshin 105,3 mlrd teńge búdjettik kredıt alǵan. Ótken 2021 jyly 18,2 mlrd teńge ıgerilgen. Al bıyl taǵy da 4,3 myń maman turǵyn úı alýy úshin búdjettik kredıt berýge 20 mlrd teńge josparlanǵan.
«Deıturǵanymen baǵdarlamanyń qabyldanǵanyna 13 jyl ótse de, aýyldyq jerlerde kadr tapshylyǵy áli de ózektiligin joıǵan joq. Eń ózekti másele - aýdan ortalyǵy bolyp otyrǵan mono jáne shaǵyn qalalar da bul jobanyń ıgiligin kóre almaı otyr. Aýylǵa maman tartý máselesin sheshemiz dep, aýdandaǵy qalalar shette qalýda. Aıtalyq, Jambyl oblysyndaǵy Talas aýdanynyń ortalyǵy Qarataý qalasyndaǵy ortalyq aýrýhanasynda 10-nan astam maman-dáriger jetispeıdi. Sondaı-aq mektepter men balabaqshalarǵa 20 muǵalim men tárbıeshige suranys bar. Jańatas pen Shý qalalarynda da dál osyndaı jaǵdaı ornaǵan. Bul problema jyldan-jylǵa sheshilmeı kele jatyr», - dedi M. Tólepbergen.
Onyń aıtýynsha, elimizdegi 42 shaǵyn qalanyń 32-si aýyldyq aýdandardyń ákimshilik ortalyǵy bolyp belgilengen.
«Sondyqtan memlekettik qamqorlyq turǵysyndaǵy qyrýar qarjynyń tıimdiligin arttyrý úshin aýdandardaǵy mono jáne shaǵyn qalalardy da jobaǵa engizý qajet. Ekinshiden, bul jobanyń tıimdiligi boıynsha vedomstvoaralyq jumystyń júıesin qaıta qarap, jetildirý qajet. Kóterilgen máselelerdiń qaraý nátıjeleri týraly jaýapty tıisti zań talabyna sáıkes belgilengen merzimde berýińizdi suraımyz», - dedi Májilis depýtaty.