QR Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti jalǵan dıplomdardyń satylýymen kúreste qandaı sharalar qabyldanyp jatqanyn túsindirdi, dep habarlaıdy almaty-akshamy.kz.
«2021 jyldan bastap «Bilim týraly» Zańynyń 39-babyna sáıkes, Sot tóreligi akademıasyn, áskerı, arnaýly oqý oryndaryn, densaýlyq saqtaý salasyndaǵy joǵary nemese joǵary oqý ornynan keıingi bilim berý baǵdarlamalaryn iske asyratyn uıymdardy qospaǵanda, bilim berý qyzmetimen aınalysýǵa lısenzıasy bar jáne akredıtteý organdarynyń tizilimine engizilgen, sondaı-aq tirkelgen joǵary oqý oryndary bilim týraly ózindik úlgidegi qujattardy beredi. Mınıstrlik joǵary oqý oryndarynyń túlekterine beriletin ózindik úlgidegi bilim týraly qujattardyń mazmunyna qoıylatyn negizgi talaptardy, bilim týraly qujattardyń serıasyn bekitti. Ózindik úlgidegi qujattardyń nómirleri men QR kodtaryn generasıalaý «Bilim týraly qujattardyń nómirlerin generasıalaý» arnaıy servısi arqyly júzege asyrylady», - delingen atalǵan vedomstvonyń Kazinform agenttigine bergen jaýabynda.
Generasıa «Joǵary bilim berýdiń biryńǵaı platformasy» aqparattyq júıesinde (JBBP) stýdentter týraly málimetter negizinde júzege asyrylady. Arnaıy servıs joǵary oqý oryndarynyń ókilderine ýnıversıtet júıesin JBBP AJ-men ıntegrasıalaý arqyly stýdent jaıynda tolyq málimet (mamandyq, úlgerim, oqý baǵdarlamasy boıynsha akademıalyq kredıtterdiń jetkilikti sanyn ıgerý, oqýǵa túsýge/aýysýǵa buıryqtyń, kýrstan kýrsqa aýysý týraly buıryqtardyń bolýy) bolǵan jaǵdaıda ǵana bilim týraly qujattardyń serıalary men nómirlerin jasaýǵa múmkindik beredi.
«Joǵary bilim berýdiń biryńǵaı platformasynda stýdent derekteri bolmaǵan jaǵdaıda, dıplom nómirin generasıalaý múmkin emes. Sonymen qatar, «Qazaqstan Respýblıkasynyń aýmaǵynda taratylatyn buqaralyq aqparat quraldarynyń monıtorıńin júrgizý qaǵıdalaryn jáne ony esepteý ádistemesin bekitý týraly» Aqparat jáne qoǵamdyq damý mınıstriniń 2019 jylǵy 29 sáýirdegi № 84 buıryǵyna sáıkes, Mádenıet jáne aqparat mınıstrligi men İshki ister mınıstrligi bilim týraly jalǵan dıplomdardy daıyndaý jáne ótkizý faktilerin anyqtaý ári jolyn kesý boıynsha turaqty negizde jumys atqaryp jatyr. Bul sharalar joǵary nemese joǵary oqý ornynan keıingi bilim týraly qujattardyń zańsyz aınalymyn boldyrmaýǵa yqpal etedi», - dep atalyp ótken komıtet aqparatynda.